ا ق ش عالىمدارى ايەلدەردى زورلىقتان قورعايتىن بىلەزىك ويلاپ تاپتى

 استانا. قازاقپارات - ا ق ش عالىمدارى ايەلدەردى زورلىقتان جانە توناۋدان قورعايتىن قۇرال ويلاپ تاپتى.

بۇل تۋرالى بيرمينگەمدەگى الاباما ۋنيۆەرسيتەتىنىڭ سايتىنا سىلتەمە جاساپ Stan.kz حابارلايدى.

«911 ءنومىرىن شاقىرۋ ارقىلى اپاتتىق حابارلاماعا ارنالعان قۇرالدى نەمەسە قوسىمشانى قولدانا الاسىز. كومەككە شاقىرۋ ءۇشىن، اتالعان قۇرالداعى تەتىكتى باسۋ كەرەك. ادەتتە قاۋىپتى جاعدايدا قالعاندا، مۇنداي مۇمكىندىك بولا بەرمەيدى» ، - دەيدى زەرتتەۋ توبىنىڭ مۇشەسى راگيب حاسان.

زەرتتەۋشىلەر اتالعان ماسەلەنى شەشۋ ءۇشىن، بىلەزىك ويلاپ تاپتى. مۇنداي بىلەزىك يەسىنە زورلىق نە ۇرلىق ءقاۋپى تونگەن كەزدە، قۇرال Bluetooth ارقىلى سمارتفونعا قوسىلىپ، شۇعىل قىزمەتتەرگە حابارلاما جولدايدى.

سونىمەن قاتار بىلەزىك قولدانۋشىنىڭ تۇرعان ورنىن كورسەتىپ، قيمىل- قوزعالىسىن تالداپ، ادامنىڭ قانداي قالىپتا ەكەنىن، ياعني تۇرعانىن نەمەسە جاتقانىن انىقتاي الادى. وعان قوسا اتالعان قۇرال قاتتى دىبىس شىعارۋ مۇمكىندىگىنە يە. وسىلايشا قولدانۋشىعا قاۋىپ تونگەن كەزدە، باسقا ادامداردىڭ نازارىن اۋدارادى.

زەرتتەۋشىلەردىڭ سوزىنشە، مۇنداي قۇرال مۇگەدەكتەر مەن ەگدە جاستاعى ادامدارعا شۇعىل كومەك قاجەت بولعان جاعدايدا قاجەتىنە جاراۋى مۇمكىن.