الماتىداعى يدەيالار جارمەڭكەسىندە جەتى مەترلىك بەسىك كورسەتىلدى
يدەيالار فەستيۆالىنە ورتالىق ازيانىڭ بەس ەلىنەن جانە اۋعانستاننان كەلگەن قاتىسۋشىلار روبوت تەحنيكاسىنان - تەسلا كاتۋشكاسى جانە ەلەكتروندى توقىما ونىمدەرىنە دەيىنگى 60 تان استام جوبانى ۇسىندى.
ۇيىمداستىرۋشىلار - ا ق ش- تىڭ قازاقستانداعى ديپلوماتيالىق ميسسياسى وكىلدەرىنىڭ ايتۋىنشا، جاس ينجەنەرلەردى، كومپيۋتەر ىزدەنۋشىلەرىن، سۋرەتشىلەردى ماڭىزدى جوبالاردى جاساۋعا شابىتتاندىرۋدىڭ قازاقستان قوعامىنا بەرەر جەمىسى مول.
«ءوز ارمانىن جاڭا تەحنولوگيالار ارقىلى جۇزەگە اسىرۋدى قالايتىن جاستاردى جاس ونەرتاپقىشتار - جاڭا «توماس ەديسوندار» دەپ اتاۋعا بولادى. مۇندا تۇرىكمەنستاننان، وزبەكستاننان، تاجىكستاننان، قىرعىزستاننان، بۇكىل قازاقستاننان جينالعان جاس دارىن يەلەرى جينالعان. ولار تەك اقپارات الماسىپ، تەحنولوگيالاردى جاي عانا پايدالانۋمەن شەكتەلمەيدى، بۇگىنگى تاڭدا ءبىز دۋشار بولىپ وتىرعان وزەكتى ماسەلەلەردىڭ جاڭا شەشىمدەرىن دە ۇسىنادى» ، - دەيدى ا ق ش- تىڭ قازاقستانداعى ەلشىسى دجوردج كرول.
فەستيۆالدا كوز تارتاتىن ايتۋلى جوبالاردىڭ ءبىرى - مەتالدان جاسالعان الىپ بەسىك بولدى. بيىكتىگى ءۇش مەتر، ۇزىندىعى جەتى مەترگە جەتەتىن بەسىككە جيىرما ادام سىيادى. جوبا اۆتورى ارايلىم جۇمادىللايەۆانىڭ ايتۋىنشا، الىپ بەسىك - بارشا تىرشىلىك يەسىنىڭ تۋۋ جانە جاڭارۋىنىڭ سيمۆولى.
بۇدان بولەك، اۆتور تاعى ءبىر ينستاللياتسياسىن - قوقىستان جاسالعان 12 ساۋكەلەنى ۇسىندى. ساۋكەلەلەردى جاساۋعا پلاستيك بوتەلكەلەر، ەسكى كيىمدەر، پوليەتيلەن پاكەتتەر، قوراپتار پايدالانىلعان.
فەستيۆالدا «مۋزىكامەن جۇرەتىن» ۆەلوسيپەد، «جاندى سۋرەتتەر» ، قولدان قۇراستىرىلعان 3D- پرينتەر، بالامالى ەنەرگيا كوزدەرى مەن ەلەكتردىڭ جۇمىس ىستەۋ ءپرينتسيپىن كورسەتەتىن «Green energy kit» جوباسى سەكىلدى تاڭعاجايىپ ونەرتابىستاردى كورگەن قوناقتاردىڭ تاڭدانىسىندا شەك بولمادى.
ايتا كەتەيىك، العاشقى Maker Faire 2006 -جىلى كاليفورنيادا وتكەن. سودان بەرى الەمنىڭ 44 قالاسى، سونىڭ ىشىندە سەۋل، ماسكەۋ، دەلي نوۆاتورلار فەستيۆالىن وتكىزدى. Almaty Mini Maker Faire جارمەڭكەسى تەحنولوگيالار سالاسىنداعى بەلسەندىلەردىڭ، كاسىبي ماماندار جانە كاسىپكەرلەردىڭ وڭىرلىك جەلىسىن قۇرۋ ماقساتىندا وتكىزىلدى.
