ءبىرقازاندار نەگە ەرتە كەلدى؟

استانا. قازاقپارات - ناۋىرزىم قورىعىنا كوكتەم كەلدى. تۇگەل تابيعات ويانىپ جاتىر. جىل قۇستارى جەتتى. بيىل ناۋىرزىمعا ناۋرىز ايىنىڭ اياعىندا، كول بەتىنىڭ سەڭى ەندى بۇزىلىپ جاتقاندا ەڭ الدىمەن سۇر ۇيرەك پەن اققۋلار قونىپتى.

قورىقتاعى عانا ەمەس، جالپى توبىل -  تورعاي وڭىرىندەگى كوكتەمنىڭ العاشقى حابارشىسى -  سۋىرلار. ولار اقپان ايىندا- اق قار استىنداعى ىنىنەن شىعا باستايدى.

-  قىس جىلى بولدى عوي، سوندىقتان اڭدار مەن قىستاپ قالاتىن قۇستار دا كوكتەمگە قوڭىمەن شىقتى. ولاردىڭ شىعىنى جوق، -  دەيدى ناۋىرزىم قورىعى ديرەكتورىنىڭ عىلىمي جۇمىستار جونىندەگى ورىنباسارى قانات باتىرحان ۇلى.

 تابيعات تىلسىمى كوپ قوي. ونى قورىقتىڭ ينسپەكتورلىق قىزمەتى دە از بايقامايدى. بيىل تۋعان جەرگە ساسىق كوكەكتەر مەن ءبىرقازاندار تىم ەرتە كەلدى. بۇگىنگە دەيىن قورىق ماماندارى 150-دەن استام ءبىرقازاندى ساناعان. ولار نەگىزى ءساۋىر ايىنىڭ اياعىندا، ءتىپتى مامىردىڭ باس كەزىندە كەلۋى ءتيىس بولاتىن. ولاردىڭ جىلداعى ىستىق مەكەنى اقسۋات كولى ءالى مۇزدان ارىلا الماي جاتقاندىقتان، ءبىرقازاندار جىلىستاپ، سۋى ارناسىن تەۋىپ جاتقان وزەندەرگە كەتىپتى.

-  ءبىرقازاندار بالىقپەن قورەكتەنەدى عوي، سوندىقتان بيىل وزەنگە قوندى، قازىر ونىڭ سۋ جايىلعان جاعالاۋى دا قۇس بازارىنا اينالعان، -  دەيدى قانات باتىرحان ۇلى.

 -  كوكتەم سوزىلىپ شىقتى دا، ساسىق كوكەكتەردىڭ قورەگى شىبىن- شىركەي دە ءالى ۇشا قويعان جوق، سوندىقتان ولار وسىمدىكتەردىڭ ءدانىن، اعاش باسىنداعى بىلتىرعى كەپكەن جيدەكتەردى جەي تۇرادى.

 «قاناتىنا كوكتەمدى ىلەستىرىپ» امان جەتكەن جىل قۇستارىنا تۋعان جەر كوك تورعىن جىبەگىن جايىپ، جاسىل جەلەگىن توسەيدى. ولارعا قورىقتان قورەك تە، قامقورلىق تا تابىلادى. قازىر اققۋدىڭ سوڭىن الا تىرنالار، شاعالالار، جابايى قاز- ۇيرەكتەر، اققۇتاندار كورىنە باستادى، ورمان قۇستارى دا «وركەسترىن» قۇراپ جاتىر.

 -  قورىقتاعى وزەندەر ءار 12-15 جىل سايىن قۇرعاپ قالىپ، قايتادان سۋعا تولىپ تۇرادى. قازىر وزەندەردە سۋ مول. جىل قۇستارى دا بيىل سوندا قونىپ جاتىر. وتكەن جىلى ءبىزدىڭ قورىقتان بۇرىن بايقالمايتىن قوقيقازدىڭ ءبىر جۇبى دا وزەنگە كەلدى، -  دەيدى قانات باتىرحان ۇلى.

 -  الايدا بيىل ءبىرقازانداردىڭ نەگە ەرتە كەلگەنىن ءدوپ باسىپ ايتا المايمىن. مۇمكىن وزەندەردىڭ سۋعا تولۋى ما، الدە ولار قىستايتىن سولتۇستىك افريكا، يران جاعى قۇستارعا قولايسىز بولدى ما، كىم ءبىلسىن... مۇمكىن، ءبىرقازانداردى تۋعان جەردىڭ تارتىلىس كۇشى تارتتى ما ەكەن؟...

ءنازيرا جارىمبەت، «ەگەمەن قازاقستان» قوستاناي وبلىسى، ناۋىرزىم اۋدانى

Egemen.kz