ەلشى كورەيا پرەزيدەنتىنىڭ ورتالىق ازياعا ساپارى نە سەبەپتى كەيىنگە قالدىرىلعانىن ءتۇسىندىردى

استانا. قازاقپارات - قازاقستانداعى كورەيا رەسپۋبليكاسىنىڭ توتەنشە جانە وكىلەتتى ەلشىسى كيم دەسيك وڭتۇستىك كورەيا پرەزيدەنتى مۋن چجە يننىڭ ورتالىق ازياعا، سونىڭ ىشىندە قازاقستانعا ساپارى داتاسىنىڭ اۋىستىرىلۋىن ءتۇسىندىردى، دەپ حابارلايدى قازاقپارات.

«الداعى سامميتتەردىڭ (ەكى كورەيا مەن ك ح د ر- ا ق ش اراسىنداعى) تاريحي ماڭىزدىلىعىن ەسكەرە وتىرىپ، كورەيا رەسپۋبليكاسىنىڭ پرەزيدەنتى ەلدى تاستاپ كەتە المايدى. سوندىقتان، 2018 -جىلدىڭ ءبىرىنشى جارتىجىلدىعىنا جوسپارلانعان ساپار كەيىنگى قالدىرىلدى. بۇل اقپاراتتى ديپلوماتيالىق كانالدار ارقىلى مەملەكەت باسشىلىعىنا حابارلاعانىمىزدا، نۇرسۇلتان نازاربايەۆ جاعدايدى وتە جاقسى ءتۇسىندى. ول كورەيا تۇبەگىندەگى كەلىسسوزدەردىڭ بەيبىتىشىلىك پەن تىنىشتىق اكەلۋى ءۇشىن تابىس تىلەدى. تۇسىنىسپەۋشىلىك بولعان جوق»، - دەدى ەلشى استاناداعى باسپا ءسوز ءماسليحاتىندا.

سونداي- اق، ول قازىرگى تاڭدا ساپاردىڭ قاي ۋاقىتقا جوسپارلانعانى بەلگىسىز ەكەندىگىن ءمالىم ەتتى.

ول مۋن چجە ين مەن ك ح د ر كوشباسشىسى كيم چەن ىننىڭ 27  -ساۋىردە ەكى كورەيانىڭ شەكاراسىنداعى پحانمۋنچجوم جەرىندە كەزدەسەتىنىن ەسكە سالدى. كەيىنىرەك كيم چەن ىن مەن ا ق ش پرەزيدەنتى دونالد ترامپ كەزدەسەدى.

«تاريحتا ا ق ش پەن ك ح د ر مەملەكەت باسشىلارى ەشقاشان كەزدەسپەگەن. ەگەر تاراپتار كەلىسىمگە قول جەتكىزسە، بۇل «عاسىر مامىلەسى» بولادى. قازىرگى تاڭدا ءسامميتتىڭ قايدا وتەتىنى تالقىلانىپ جاتىر»، - دەپ ءتۇسىندىردى ديپلومات.

سونىمەن قاتار، ەلشى كيم دەسيك قازاقستاننىڭ تەك كورەيا تۇبەگىن عانا ەمەس، جالپى الەمدى يادرولىق قارۋسىزداندىرۋعا قوسقان ۇلەسىن اتاپ ءوتتى.

«قازاقستان ءبىز ءۇشىن ورتالىق ازياداعى ماڭىزدى ەل بولىپ تابىلادى. (...) قازاقستان حالىقارالىق الاڭداردا كورەيا رەسپۋبليكاسىن قولداپ، ك ح د ر - گە يادرولىق قارۋسىز- اق ءومىر سۇرۋگە بولاتىنىن ۇنەمى ءبىلدىرىپ ءجۇر. پرەزيدەنت نۇرسۇلتان نازاربايەۆ 1993 - جىلى قازاقستانداعى سەمەي يادرولىق پوليگونىن جاپتى. وسى ارقىلى الەمدىك قاۋىپسىزدىككە ۇلكەن ۇلەس قوستى. سونداي- اق، ول ۇنەمى يادروسىز الەم قۇرۋعا بايلانىستى ءبىرقاتار باستامالاردى كوتەرۋدە»، - دەدى ديلومات.

ونىڭ ايتۋىنشا، نۇرسۇلتان نازاربايەۆ كورەياعا التى رەت ساپارلاعان. جالپى، ەكى ەلدىڭ باسشىلارى اراسىندا جوعارى دەڭگەيدە 13 كەزدەسۋ بولعان.

 كيم دەسيك قازاقستاننىڭ بارلىق كەزدەسۋلەر مەن سامميتتەردە كورەيا تۇبەگىن يادرولىق قارۋسىزداندىرۋ ماسەلەلەرى بويىنشا كورەيا رەسپۋبليكاسىنىڭ ۇستانىمىن قولداپ كەلە جاتقانى ءۇشىن العىس ءبىلدىردى.