ەردەن قاجىبەك: قازاق ءتىلىنىڭ اۋەزدىلىگىن ساقتاپ، جازۋ مەن ايتىلۋ پرينتسيپتەرىن قايتارۋ قاجەت
«لاتىن گرافيكاسىن تەحنيكالىق جاعىنان پايدالانۋ بويىنشا بارلىق ماسەلەلەر بىرتە- بىرتە شەشىلەدى. ەڭ ۇلكەن پروبلەما - پسيحولوگيالىق پروبلەما. كەيبىر ادامدار ويلايدى، ءارىپتى اۋىستىرا سالامىز دا، بولدى. جوق، ولاي ەمەس. ءبىز - دۇرىس جازۋدى ۇمىتقان حالىقپىز. ءبىز - قاتە جازۋعا ۇيرەنگەن حالىقپىز. سوندىقتان جاڭا جازۋ ءسال توسىن كورىنەدى. سوندىقتان ءبىراز ۇيرەتۋ كەرەك، ءتۇسىندىرۋ كەرەك. قازىر مىنا بىزدەگى دىبىس سانىن ءتۇسىنۋدىڭ ءوزى قيىننىڭ قيىنى. قاراپايىم ادام بىلاي تۇرسىن، عالىمداردىڭ وزدەرى شاتاسادى. سول سەبەپتى قازاق ءتىلىنىڭ زاڭدىلىقتارىن ساقتاي وتىرىپ، دۇرىس جازۋ ءۇشىن ءبىراز ۋاقىت قاجەت. دايىندىق شارالارىن سوزىپ جاتقانىمىز دا سودان»، - دەيدى احمەت بايتۇرسىنوۆ اتىنداعى ءتىل ءبىلىمى ينستيتۋتىنىڭ ديرەكتورى، پروفەسسور ەردەن قاجىبەك.
عالىمنىڭ ايتۋىنشا، ەكى جىلدان كەيىن 0- سىنىپ وقۋشىلارى لاتىن قارىپتەرىن ۇيرەنەدى. جاڭا الىپپە دە بولادى. وقۋلىقتار لاتىن گرافيكاسىمەن باسىلادى.
«ەندىگى ماسەلە، قازاق ءتىلىنىڭ اۋەزدىلىگىن ساقتاي وتىرىپ، جازۋ مەن ايتۋ پرينتسيپتەرىن قايتارۋىمىز قاجەت. تازا قازاقشا جازۋىمىز كەرەك. ايتپەسە، قازىر قازاق تىلىندە ەرەجە كوپ. ونىڭ جارتىسى ءبىزدىڭ ەرەجە ەمەس. سوسىن قازىر الىپبيگە بايلانىستى كوپ پروبلەمالار تۋىنداپ جاتىر عوي. ونىڭ بىردە- بىرەۋىنىڭ قازاق تىلىنە قاتىسى جوق. «تسەمەنتتى» قالاي جازامىز؟ باسقانى قالاي جازامىز دەيدى. ءبىز ءبىر ءتىلدىڭ ءالىپبيىن جاساۋىمىز قاجەت. ءبىر ءتىلدىڭ ەرەجەلەرىن جاساۋىمىز كەرەك. ال بوتەن سوزدەردى ءوز تىلىمىزگە باعىندىرىپ، تىلىمىزگە كىرگىزۋگە بولادى. «موسكۆا» دەگەن ءسوزدى «ماسكەۋ» دەدىك قوي. «روسسيا» دەگەندى «رەسەي» دەدىك قوي. ءدال سولاي كەز كەلگەن ءسوزدى قازاقشالاۋعا بولادى. ۇيرەنۋ دە وڭاي بولادى. ەرەجەسى دە از بولادى»، - دەپ اتاپ كورسەتتى ە. قاجىبەك قازاقپارات تىلشىسىنە بەرگەن سۇحباتىندا.
اۆتور: ارمان اسقاروۆ
