ەلباسىنا مەملەكەتتىك قىزمەتتىڭ جاعدايى تۋرالى ۇلتتىق بايانداما تانىستىرىلدى
بۇل تۋرالى ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا اگەنتتىك ءتوراعاسىنىڭ ورىنباسارى ايگۇل شايىموۆا ءمالىم ەتتى.
«ۇلتتىق باياندامادا مەملەكەتتىك قىزمەتتىڭ جاعدايى مەن تاۋەلسىزدىك جىلدارىنداعى دامۋ كەزەڭدەرى، ونىڭ بولاشاقتاعى دامۋ جولى تۋرالى ايتىلعان. بيىل ۇلتتىق بايانداما تۇڭعىش رەت مەملەكەت باسشىسىنىڭ قاراۋىنا ۇسىنىلىپ، ماقۇلداۋعا يە بولدى»، - دەدى سپيكەر.
ايگۇل شايىموۆانىڭ ايتۋىنشا، ۇلت جوسپارى جۇزەگە اسىرىلا باستاعان ۋاقىتتان بەرى قىزمەتتەگى مانساپ ساتىسىمەن ءوسىپ كەلە جاتقان مەملەكەتتىك قىزمەتشىلەر سانى 4 ەسە وسكەن.
جۇرگىزىلگەن الەۋمەتتىك ساۋالنامالاردىڭ ناتيجەلەرىنە سۇيەنسەك، رەسپوندەنتتەردىڭ 77 پايىزىنان استامى كادرلىق شەشىمدەر شىعارۋدا مەريتوكراتياعا سەنەتىندەرىن ايتقان. ال 2011 -جىلى بۇل كورسەتكىش 39 پايىزدى قۇراعان.
اۋقىمدى الدىن الۋ جۇمىستارىنىڭ ناتيجەسىندە ادەپ نورمالارىن بۇزعانداردىڭ وتكەن جىلعى كورسەتكىشتەرى 2015 -جىلمەن سالىستىرعاندا 43 پايىزعا ازايعان.
«ساراپشىلاردىڭ پىكىرى بويىنشا، قازىرگى قازاقستاندىق مەملەكەتتىك قىزمەت حالىقارالىق ستاندارتتارعا سايكەس كەلەدى. ءتىپتى كەيبىر جەرلەردە ونىڭ باسىمدىعى دا بار»، - دەيدى ايگۇل شايىموۆا.
مەملەكەتتىك قىزمەت ىستەرى جانە سىبايلاس جەمقورلىققا قارسى ءىس- قيمىل اگەنتتىگى مەملەكەتتىك قىزمەتشىلەرگە ەڭبەكاقى تولەۋدىڭ فاكتورلىق- بالدىق جۇيەسى بويىنشا پيلوتتىق جوبانى قورىتىندىلادى.
«ەڭبەكاقى تولەۋدىڭ فاكتورلىق- بالدىق جۇيەسىنىڭ ارقاسىندا ەلىمىزدە مەملەكەتتىك قىزمەتكە دەگەن قىزىعۋشىلىق ارتىپ كەلەدى»، - دەدى قازاقپارات تىلشىسىنە ق ر مەملەكەتتىك قىزمەت ىستەرى جانە سىبايلاس جەمقورلىققا قارسى كۇرەس اگەنتتىگى ءتوراعاسىنىڭ ورىنباسارى ايگۇل شايىموۆا.
سپيكەردىڭ ايتۋىنشا، ءبىر ورىننىڭ كونكۋرسى ەكى ەسەگە وسكەن.
«جەكە وڭىرلەر بويىنشا ايتاتىن بولساق، مىسالى، مەملەكەتتىك قىزمەت ىستەرى اگەنتتىگىنىڭ قاراعاندى وبلىستىق دەپارتامەنتىنىڭ باسشىسى قىزمەتىنە جاريالانعان كونكۋرسقا 55 ادام، وڭتۇستىك قازاقستان وبلىسىندا باس مامان قىزمەتىنە - 47 ادام قاتىسقان»، - دەدى ايگۇل شايىموۆا.
فاكتورلىق- بالدىق جۇيە بويىنشا پيلوتتىق جوبا ءتورت مەملەكەتتىك ورگاندا جۇرگىزىلىپ جاتىر.
