مينيسترلىك ۋنيۆەرسيتەتتەردى قىسقارتۋعا قاتىستى پرەزيدەنتتىڭ تاپسىرماسىن ءتۇسىندىردى
«نەگىزى، قىسقارتۋدىڭ ءارتۇرلى جولدارى بار عوي. كۇشتەپ ماماندىقتاردى الىپ تاستاۋ جانە تاعىسىن تاعى. ءبىراق ەشكىم (ماماندىقتى - اۆت. ) بەرگىسى كەلمەيدى. بارلىعى ءوز ۋنيۆەرسيتەتىن دۇرىس دەپ ويلايدى. الايدا، ەڭبەك نارىعىندا ول ماماندىقتى يگەرگەن تۇلەكتەرگە سۇرانىس قانداي؟ بىلىمگە ساي جالاقى الىپ وتىر ما؟ ۋنيۆەرسيتەتتىڭ وقۋ باعدارلاماسى زامان تالابىنا ساي ما؟ ول باعدارلاما بويىنشا العان ءبىلىم قانشا ۋاقىتقا جەتەدى؟ ءبىز وسى ماسەلەلەردى انىقتاۋ ماقساتىندا ارنايى رەيتينگ ازىرلەۋدى ۇيعاردىق. ەندى، بىزدە ۋنيۆەرسيتەتتەردىڭ رەيتينگتەرى كوپ قوي. ءبىراق ولاردىڭ ىشىندە ءبىز قويعان سۇراقتارعا جاۋاپ بەرەتىندەر ازداۋ»، - دەدى تالعات ەشەنقۇلوۆ.
ونىڭ ايتۋىنشا، مينيسترلىك جۇمىس بەرۋشىنىڭ باعاسى نەگىزىندە ارنايى رەيتينگ قۇرۋدى كوزدەيدى. اتالعان باستامانى «اتامەكەن» ۇلتتىق كاسىپكەرلەر پالاتاسى دا قولداپ، ىسكە اسىرۋعا كىرىستى.
«قازىر ولار IT ماماندىعى بويىنشا ءبىرىنشى رەيتينگتى دايىنداپ جاتىر. وندا ناقتى تالاپتار دا بولادى. بىرىنشىدەن، تۇلەكتەردىڭ جۇمىسقا تۇرۋ كورسەتكىشى، ەكىنشىدەن، ولاردىڭ جالاقىسى ەسكەرىلەدى. سوسىن، وقۋ باعدارلاماسىنىڭ ساپاسىنا باعا بەرىلەدى. مىسالى، الدىمەن ءاربىر ۋنيۆەرسيتەتتىڭ IT ماماندىعى بويىنشا وقۋ باعدارلامالارىن جيناپ الادى. ودان كەيىن جۇمىس بەرۋشىلەر ول باعدارلامالارعا ءوز باعاسىن بەرەدى. مىنا باعدارلاما ەسكى، سول جەردە وقىعان ماماندى جۇمىسقا الاتىن بولساق، ونى قايتادان وقىتۋعا تۋرا كەلەدى، بىزگە دۇرىسى مىناۋ دەپ، ءاربىر جۇمىس بەرۋشى باعالايدى. سونىڭ نەگىزىندە جوعارى وقۋ ورىندارىنىڭ رەيتينگى جاسالادى. بىزدىكى وسى رەيتينگ ارقىلى رەتتەيمىز دەگەن وي. رەيتينگ ارقىلى مەكتەپ تۇلەكتەرىنە باعىت بەرۋ، ەڭ ءتيىمدى جول دەپ ويلايمىز»، - دەپ اتاپ كورسەتتى ت. ەشەنقۇلوۆ.
مينيسترلىكتىڭ جوسپارىنا سايكەس، وسى ايدا «اتامەكەن» پالاتاسى IT ماماندىعى بويىنشا العاشقى رەيتينگتى جاريالايدى. ال جىلدىڭ اياعىنا دەيىن 2 مىڭ وقۋ باعدارلاماسىن جۇمىس بەرۋشىلەردىڭ ساراپتاماسىنان وتكىزۋ جوسپارلانعان. مەكتەپ تۇلەكتەرى جوعارى وقۋ ورىندارىن اتالعان رەيتينگتەر بويىنشا تاڭداسا، ساپاسىز ۋنيۆەرسيتەتتەرگە دەگەن سۇرانىس ونسىز دا تومەندەيدى.
ايتا كەتەيىك، كۇنى كەشە «100 جاڭا وقۋلىق» جوباسىنا ارنالعان جيىندا ق ر پرەزيدەنتى نۇرسۇلتان نازاربايەۆ جوعارى ءبىلىمنىڭ ساپاسىن كوتەرۋ قاجەتتىگىنە ەرەكشە توقتالدى. وسى ورايدا مەملەكەت باسشىسى ۋنيۆەرسيتەتتەردى قىسقارتۋ ماسەلەسىن قوزعادى.
«قازىر مينيسترلىككە كۇندە كەلىپ، ۋنيۆەرسيتەت اشايىق دەيدى. قالتاسىنا اقشا تۇسسە، ۋنيۆەرسيتەت اشۋعا ۇمتىلادى. بىزدە 130 ۋنيۆەرسيتەت بار، ونى قىسقارتۋ كەرەك. بىزگە ونىڭ سانى ەمەس، ساپاسى قاجەت. قازىر رەيتينگ جۇرگىزىلەدى. رەيتينگ جۇرگىزىلگەن كەزدە IT - تەحنولوگيادان، جاڭاشىلدىقتان، تەحنيكادان، ينجەنەرلىكتەن قالاي دەگەن كەزدە بارلىق ۇلكەن ۋنيۆەرسيتەتتەرىمىز ارتتا قالدى. جاي جەكە ۋنيۆەرسيتەتتەر الدىعا شىقتى. وسى جاعدايدان كەيىن مىنا ۋنيۆەرسيتەتتەر وزىنەن- ءوزى قالادى. سەبەبى ءبىز ولارعا گرانت بەرە المايمىز»، - دەدى ن. نازاربايەۆ.
مەملەكەت باسشىسىنىڭ ايتۋىنشا، ۋنيۆەرسيتەتتەر ساقتالىپ قالامىن دەسە، زامانعا ساي بولۋى ءتيىس. «ءبىز جاستارعا قۇر اشەيىن ديپلوم الۋ ءۇشىن وقىماۋ كەرەكتىگىن ايتۋعا ءتيىسپىز. كەزىندە ول زاماننان دا وتكەنبىز. قالتاسىندا بىرنەشە ديپلوم بولعانىمەن جاي جۇرگەن، جۇمىس تابا الماي جۇرگەن قانشاما ازامات بار. سوندىقتان مىسالى ۋنيۆەرسيتەتتىڭ 4- كۋرسىنان باستاپ ستۋدەنتتەردى 80-85 پايىزىن بيزنەس ادامدارى جۇمىسقا تارتىپ الاتىن بولسا، وندا ول ناعىز ۋنيۆەرسيتەت»، - دەپ اتاپ وتكەن بولاتىن ق ر پرەزيدەنتى.
اۆتور: ارمان اسقاروۆ
