قازاقستاندا تاعى ءۇش مەملەكەتتىك قورىق اشىلادى - بەرىك ءابدىعالي ۇلى

استانا. قازاقپارات - «قاسيەتتى قازاقستان» عىلىمي- زەرتتەۋ ورتالىعىنىڭ باسشىسى بەرىك ءابدىعالي ۇلى جاڭادان اشىلاتىن ءۇش مەملەكەتتىك قورىققا قاتىستى ارنايى قاۋلىنىڭ شىققانىن مالىمدەدى، دەپ حابارلايدى قازاقپارات ءتىلشىسى.

 «بۇگىن سىزدەرمەن جاقسى حاباردى بولىسكىم كەلىپ وتىر. مادەنيەت جانە سپورت مينيسترلىگىنىڭ ۇسىنىسىمەن ارنايى ءۇش مەملەكەتتىك قورىق اشىلايىن دەپ جاتىر. پرەزيدەنت اكىمشىلىگى قولدادى. ۇكىمەت قاۋلىسى دا شىقتى. بۇل - مەملەكەت باسشىسىنىڭ تاپسىرماسى. ءبىرىنشى قورىق ول - استانانىڭ ماڭايىنداعى بوزوق. ونى كوبىسى بىلە بەرمەيدى. ءبىراق استانا بۇل جەردە كەزدەيسوق سالىنعان جوق. ول - قازاق تاريحىندا ەلەۋلى وقيعالار بولعان جەر. بوزوق سونىڭ ءبىر دالەلى بولسا كەرەك. بولاشاقتا سول جەردە ۇلكەن مۋزەي مەن ۆيزيت- ورتالىعى اشىلادى»، - دەدى ب. ءابدىعالي ۇلى «بولاشاققا باعدار: رۋحاني جاڭعىرۋ» باعدارلاماسى بويىنشا ەسەپ بەرۋ كەزدەسۋىندە.

ونىڭ ايتۋىنشا، ەكىنشى قورىق - بوتاي. ول جەردە ادامزات بالاسى تۇڭعىش رەت جىلقىنى قولعا ۇيرەتتى. ونى الەم عالىمدارى دا مويىنداپ وتىر. «ءۇشىنشىسى - سارايشىق. بىلتىردان بەرى اتىراۋ وبلىستىق اكىمدىگىنىڭ باستاماسىمەن ۇلكەن جوندەۋ جۇمىستارى اتقارىلىپ جاتىر. كەزىندە قاسىم حاندار ەلدىڭ استاناسىن ۇلىتاۋدان سول جەرگە اپارعان. ءسويتىپ، التىن وردانىڭ مۇراگەرى ءبىز ەكەنىن كورسەتتى. سوندىقتان سارايشىق ءبىز ءۇشىن ۇلكەن گەوساياسي قۇندىلىق. سونى ناسيحاتتاپ، جەتكىزە ءبىلۋىمىز كەرەك»، - دەپ اتاپ كورسەتتى ب. ءابدىعالي ۇلى.

 ايتا كەتسەك، بۇگىن استانادا ق ر ۇلتتىق مۋزەيىندە «بولاشاققا باعدار: رۋحاني جاڭعىرۋ» باعدارلاماسىنىڭ ءبىر جىلدىعىنا ارنالعان ەسەپ بەرۋ جيىنى ءوتتى.

اۆتور: ارمان اسقاروۆ