قازاقتىڭ ءۇش بيىنە «وتپان» كەشەنىندە ەسكەرتكىش ورناتىلدى

استانا. قازاقپارات - «وتپان» تاريحي مادەني كەشەنىندە قازاقتىڭ ءۇش بيىنە ەسكەرتكىش ورناتىلدى. بۇل تۋرالى بۇگىن ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا ماڭعىستاۋ وبلىسىنىڭ اكىمى ەرالى توعجانوۆ ايتتى، دەپ حابارلايدى قازاقپارات.

 «ەلباسىنىڭ جارلىعىمەن بەكىتىلگەن «العىس كۇنىنە» وراي وبلىس بويىنشا 1- ناۋرىزدان باستاپ «اسار - جومارت جۇرەك» قايىرىمدىلىق اكسياسىنىڭ 2 - كەزەڭى ءوتتى. ناتيجەسىندە، 55 ميلليون تەڭگە جينالىپ، 6,5 مىڭعا جۋىق وتباسىعا كومەك كورسەتىلدى. ولاردىڭ قاتارىندا اۋىر سىرقاتقا شالدىققان سابيلەر، بالالار ءۇيىنىڭ تاربيەلەنۋشىلەرى، قارتتار ۇيىندەگى قاريالار، الەۋمەتتىك جاعدايى تومەن وتباسىلار، جالعىز باستى انالار مەن قامقورشىسىنان ايىرىلعان بالالار بار»،- دەدى وبلىس باسشىسى.

سونىمەن قاتار ول بيىل العاش رەت وڭىردە «وتپان تاۋ- رۋحاني ءداستۇرىمىزدىڭ نەگىزى» اتتى امال مەرەكەسى رەسپۋبليكالىق دەڭگەيدە تويلانعانىن اتاپ ءوتتى. شاراعا ەلىمىزدىڭ 9 وبلىسىنداعى تاريحي- مادەني كەشەندەرىنىڭ شىراقشىلارىنىڭ قاتىسۋىمەن «بىرلىك» وتى جاعىلدى. ماڭگىلىك ەل يدەياسىن ناسيحاتتايتىن عىلىمي، مادەني كوپشىلىك، سپورتتىق، الەۋمەتتىك دەڭگەيدەگى شارالارعا بارلىق ايماقتان ارنايى قوناقتار شاقىرىلىپ، تاماشالادى.

«كەلەسى جىلى حالىقارالىق دارەجەدە وتكىزۋگە دايىندىقتى قازىردەن باستايمىز. «وتپان» تاريحي مادەني كەشەنىنە قازاقتىڭ ءۇش بيىنە ەسكەرتكىش ورناتتىق. قازاق بيلەرىنە ءبىرىنشى رەت دالادا ەسكەرتكىش ورناتىلدى. بۇل بيلەرىمىز بىرلىكتىڭ، ەلدىكتىڭ سيمۆولى بولعاندىعىن دا وزدەرىڭىز جاقسى بىلەسىزدەر»،- دەدى ەرالى توعجانوۆ.