موڭعوليانىڭ ەكى بىردەي بۇرىنعى ۇكىمەت باسشىسى قاماۋعا الىندى

بايان- ولگەي. قازاقپارات - موڭعوليانىڭ ەكى بىردەي ەكس-پرەمەر-ءمينيسترى سىبايلاس جەمقورلىققا قاتىسى بار دەگەن كۇدىكپەن قاماۋعا الىندى، دەپ حابارلايدى وسى ەلدەگى «قازاقپارات» ح ا ا- نىڭ مەنشىكتى ءتىلشىسى.

موڭعوليانىڭ سىبايلاس جەمقورلىققا قارسى ءىس-قيمىل اگەنتتىگى بۇرىنعى ۇكىمەت باسشىلارى سانجااگيين بايار مەن چيمەديين سايحانبيلەگتى 10 -ءساۋىر كۇنى قاماۋعا العان بولاتىن. ولار «ويۋتولگوي» جوباسى بويىنشا ەل ۇكىمەتى مەن «Ivanhoe Mines Mongolia Inc»، «Ivanhoe Mines Limited» جانە «Rio Tinto International Holdings Limited» كومپانيالارىنىڭ اراسىندا 2009 جىلعى 6 -قازانداعى ينۆەستيسيالىق كەلىسىم جانە اكسيونەرلەر تۋرالى شارت جاسالعاندا، 2015 -جىلدىڭ 18 -مامىرىندا جەراستى كەن ورىندارىن يگەرۋ جانە قارجىلاندىرۋ جوسپارىن بەكىتكەندە وزدەرىنىڭ وكىلەتتىگىن جانە مانسابىن پايدالانىپ، زاڭسىز شەشىمدەر قابىلداپ، ۇكىمەتكە زيان كەلتىرگەن بولۋى مۇمكىن دەگەن كۇدىككە ىلىنگەن.

بۇگىن سوت وتىرىسىندا ولاردى قاماۋدا ۇستاۋ ۋاقىتىن 30 كۇنگە ۇزارتۋ تۋرالى شەشىم قابىلداندى.

كۇدىكتىلەر سوت ماجىلىسىنە ونلاين رەجيمىندە قاتىسقان. بۇل تۋرالى ۇكىمەت باسشىسى قىزمەتىن اتقارعان سانجااگيين باياردىڭ اقتاۋشىسى ا. اريۋناا ب ا ق وكىلدەرىنە ءمالىم ەتكەن.

«سوت وتىرىسىندا مەنىڭ قورعاۋىمداعى سانجااگيين باياردى 1 ايعا قاماۋ تۋرالى شەشىم شىعارىلدى. س. باياردى 10 -ءساۋىر كۇنى 18 ساعاتتا سوتتىڭ رۇقساتىنسىز تۇتقىندادى. تۇتقىنداۋعا نەگىزگى سەبەپ - قىلمىس وقيعالارىنىڭ ءىزىن، دالەلىن جويۋدىڭ الدىن الۋ. مەن بۇعان قارسىلىق تانىتىپ، شاعىمداندىم. «ويۋتولگوي» كەلىسىم شارتتارىنا بايلانىستى بارلىق ماتەريالدار قازىر كابينەت حاتشىلىعىنىڭ مۇراعاتى، پارلامەنت ارحيۆتەرىنىڭ جانە ۇلتتىق قاۋىپسىزدىك كەڭەسىنىڭ مۇراعاتتارىنىڭ بارلىعىندا ساقتاۋلى. وسىعان قاراماي اتالعان كەلىسىم شارتقا بايلانىستى ماتەريالداردى جويۋى، تاسىمالداۋى جانە قايتادان زاڭ بۇزۋى مۇمكىن دەگەن جەلەۋمەن تۇتقىنداۋعا (سانجااگيين باياردى - رەد. ) قۇقىقتىق نەگىز جوق»، - دەدى ول.

ال ەكس-پرەمەر سانجااگيين بايار: «بۇگىن مەنى 1 ايعا قاماۋعا العانى ماڭىزدى ەمەس. ماڭىزدىسى - الەم ەلدەرىنىڭ الدىندا ەكى بىردەي بۇرىنعى ۇكىمەت باسىشىسىن قاماۋعا الۋ ارقىلى موڭعول ەلىنىڭ بەت-بەدەلىنىڭ ءتۇسۋى. وسىدان سوڭ «ويۋتولگاي» اكسياسىنىڭ قۇلدىراۋ ماسەلەسى تۋىنداۋى مۇمكىن. بۇل موڭعوليا ەكونوميكاسىنا كەرى اسەر ەتەدى. الدىمەن وسى جاعىن جاقسىلاپ ويلاڭىزدار»، - دەدى.

ەستەرىڭىزگە سالا كەتەيىك، سانجااگيين بايار 2007-2009 -جىلدارى موڭعوليا ۇكىمەتىنىڭ باسشىسى بولىپ قىزمەت ەتسە، چيمەديين سايحانبيلەگ 2014 - 2016 -جىلدارى ەل ۇكىمەتىن باسقارعان.

  

 قۋات ۋاتحان