نيۋ-يوركتە قازاق ءتىلى كۋرسى اشىلدى - كەسكىن
بۇل - «بولاشاق» باعدارلاماسىنىڭ ستيپەندياتتارىنىڭ باستاماسى. ا ق ش- تا ءبىلىم الىپ جۇرگەن ءبىر توپ ستۋدەنتىمىز، وقۋدان بوس ۋاقىتتا وزگەلەرگە قازاق ءتىلىن ۇيرەتىپ ءجۇر.
نيۋ-يوركتەگى «بولاشاق» ستيپەندياتىنىڭ يەگەرلەرى شەتەلدەگى قازاقستاندىقتار مەن امەريكالىقتارعا قازاق ءتىلىن ۇيرەتۋگە كىرىستى. الىپ مەگوپوليستە ۇلى دالانىڭ ءداستۇرى مەن مادەنيەتىن، ءتىلى مەن سالتىن ۇيرەنۋگە تالاپتانعاندار سانى الدەقايدا كوپ بولىپ شىققان.
«وسىندا «بولاشاق» باعدارلاماسى بويىنشا وقۋعا كەلگەن جەرلەستەرىمىز كوپ. ارامىزدا قازاق ءتىلىن جوعارى دەڭگەيدە ۇيرەتە الاتىن ۇستازدار، فيلولوگ، جۋرناليستەر بار. سوندىقتان ءبارىمىز باس قوساتىن ورىن تابۋ كەرەك دەپ شەشتىم. نيۋ-يوركتە قازاق ءتىلىن ۇيرەنگىسى كەلەتىندەرگە ارناپ، Facebook-تە حابارلاندىرۋ جازدىم. العاشقى ساباققا 15 بالا مەن ون شاقتى ۇلكەن كىسى كەلگەندە تاڭعالدىم. بارلىعى وسى باستامامىزدى قىزۋ قولداپ وتىر»، - دەدى قازاق ءتىلى كۋرستارىنىڭ ۇيىمداستىرۋشىسى راۋشان نايزابايەۆا.
راۋشان نايزابايەۆانىڭ «بولاشاق» ستيپەندياسىنىڭ ارقاسىندا نيۋ-يورك ۋنيۆەرسيتەتىندە «ونلاين جانە باسپا مەدياسى» ماگيسترلىك باعدارلاماسى بويىنشا ءبىلىم الىپ جاتقانىنا ەكى جىل بولدى. جۋرناليست قازاقستاندىق ستۋدەنتتەر مەن دياسپورانىڭ باسىن قوسىپ، ءتۇرلى شارالار ۇيىمداستىرىپ ءجۇر. استانادان ەكى بالاسىمەن بىرگە كەلگەن راۋشان ءبىراز ۋاقىتتان كەيىن بالالارىنىڭ انا ءتىلىن ۇمىتا باستاعانىن بايقاعان. كوپتەگەن جەرلەسى دە وسى ماسەلەگە ۋايىمداپ جۇرگەنىن اڭعارادى.
وسىعان وراي ءوزى وقىپ جۇرگەن ۋنيۆەرسيتەت اكىمشىلىگىنەن قازاق ءتىلىن مەڭگەرۋگە ارنالعان اۋديتوريا ءبولۋدى سۇرايدى. بۇكىل الەمنەن كەلگەن 50 مىڭنان اسا ستۋدەنت وقيتىن ا ق ش- تىڭ ەڭ ءىرى جوعارى وقۋ ورنى قازاق قىزىنىڭ بۇل ءوتىنىشىن جەردە قالدىرماعان.
«وتانداستىرىمىزدىڭ باستاماسى ارقاسىندا انا ءتىلىمىزدى ودان ارى دامىتۋعا، تەرەڭىرەك وقۋعا ۇلكەن مۇمكىندىك تۋدى. قازاق ءتىلىن ۇيرەتۋدەن بولەك بۇل جەردە قازاق حالقىنىڭ سالت-ءداستۇرىن، مادەنيەتىن، تاريحىن وقۋعا باسا نازار اۋدارىلعان. قازاق حالقىنىڭ ماقال-ماتەلدەرىن تالداۋ مەن ءۇشىن ەڭ قىزىقتى ساباق بولدى»، - دەدى وقۋشى مادينا احمەدينا.
بۇگىندە نيۋ-يوركتەگى قازاق ءتىلى كۋرسىنا 40 تان اسا ادام قاتىسادى.
وقۋ ۋاقىتى - ەكى ساعات. قازاق ءتىلى بالالارعا ويىن تۇرىندە وقىتىلادى، سوسىن اتا-انالارىمەن بىرگە تاريح پەن سالت-داستۇرلەردى «سپيكينگ كلاب» فورماتىندا تالقىلايدى.
«ءبىز قازاق ءتىلىن، مادەنيەتىن، ءداستۇرىن بىلگەن سوڭ كەلەر ۇرپاققا ونى ۇيرەتۋ ءبىزدىڭ پارىزىمىز دەپ بىلەمىن. سوندىقتان باسقا ستۋدەنتتەردى قازاق تىلىندە سويلەتۋ، ۇيرەتۋ - ءبىزدىڭ ماقساتىمىز»، - دەپ اتاپ ءوتتى ۇستاز اليا جۋنۋسوۆا.
نيۋ-يوركتەگى وقۋشىلار بالاباقشا مەن مەكتەپ پارتاسىندا لاتىن ارىپتەرىن وقيتىندىقتان، ولار قازاق الفاۆيتىنىڭ لاتىن الىپبيىنە كوشۋىن تاعاتسىزدانا كۇتتى. بولاشاقتا لاتىن الىپبيىمەن جازىلعان جاڭا وقۋلىقتار شىعا قالسا، بالالاردى وقىتۋ اناعۇرلىم جەڭىل بولماق. نيۋ-يوركتەگى وتانداستارىمىز وسى كلۋبتى بالالاردىڭ ۇلتتىق ءبي مەن دومبىرا تارتۋدى ۇيرەنەتىن، قازاقشا سويلەسەتىن مادەنيەت ورتالىعى رەتىندە كەڭەيتۋگە نيەتتى.
