استانا جاستار تەاترى «قىز جىبەك» وپەراسىن جاڭا قىرىنان ۇسىندى
قويىلىم الدىندا ارنايى باسپا ءسوز ءماسليحاتى ۇيىمداستىرىپ، وندا استانا جاستار تەاترىنىڭ كوركەمدىك جەتەكشىسى، باس رەجيسسەرى نۇرقانات جاقىپباي قويىلىم جايىندا كەڭىنەن اڭگىلەمەپ بەردى.
«قازاق ونەرىندەگى شوقتىعى بيىك شىعارمانىڭ ءبىرى - «قىز جىبەك» . «قىز جىبەك» دەسە قازاقتىڭ ءيسى اڭقيدى. وسىدان بىرنەشە جىل بۇرىن اتالعان شىعارما تەك وپەرانىڭ توڭىرەگىندە قالىپ قويماسا ەكەن، زاماناۋي تىلدە سويلەتسەك دەگەن وي تۋدى. وسىدان 5-6 جىل بۇرىن جۇرگەنوۆ اتىنداعى ونەر اكادەمياسىنداعى شەبەرحانامدا «قىز جىبەك» شىعارماسىنا بايلانىستى ديپلومدىق جۇمىس قورعاپ، ارى قاراي دامىتسا دەگەن ارمانىم دا بولدى. سودان ءانشى، كومپوزيتور ەربولات قۇدايبەرگەنوۆكە بۇل شىعارمانى روك- وپەرا نە ميۋزيكل جانرىندا دامىتۋعا قولقا سالدىم. ول ءبىر جىل بويى جاستارعا ارنالعان نۇسقاسىن جاساپ شىعاردى» ، - دەدى ول.
ونىڭ ايتۋىنشا، ەربولات قۇدايبەرگەنوۆتىڭ جازىپ شىققان نۇسقاسى ونەر اكادەمياسىندا ديپلومدىق جۇمىس رەتىندە قويىلعان. الايدا تەاترعا قويۋعا جەتىسپەيتىن دۇنيەلەرى بولعان.
«وسىدان كەيىن تەاترىمىزدىڭ مۋزىكالىق ارلەۋشىسى، اكتەر جانداۋلەت باتاي ميۋزيكلگە قازاقتىڭ دومبىرا، شەرتەر سىندى اسپاپتارىن قوسىپ، فولك- روك جانرىنا بەيىمدەپ شىعاردى. ۇنادى، قۇلاققا جاعىمدى ەستىلدى. سودان تۇرىپ قالعان جۇمىسىمىزدى بيىل قايتا قولعا الىپ، ەندى مىنە بۇگىن پرەمەراسى» ، - دەدى نۇرقانات جاقىپباي.
ايتا كەتەيىك، جاستار تەاترى «رۋحاني جاڭعىرۋ» اياسىندا استانانىڭ 20 جىلدىعىنا وراي جاڭاشا ۇسىنعان عابيت مۇسىرەپوۆتىڭ «قىز جىبەك» ميۋزيكلىنىڭ بۇگىن پرەمەراسى ءوتتى. سونىمەن قاتار 13, 14, 15 - ءساۋىر كۇندەرى دە ەلوردا جۇرتشىلىعى مەن قوناقتارى بۇل ميۋزيكلدى تاماشالاي الادى.
«قىز جىبەك» - ماڭگىلىك ماحاببات جىرى. شەكتى رۋىنىڭ ايداي سۇلۋ ارۋى جىبەك پەن جاعالبايلى رۋىنىڭ باتىرى، سەرى تولەگەننىڭ اراسىندا تۇتانعان سەزىم شوعى كىرشىكسىز ماحابباتقا ۇلاسادى. الايدا ماحاببات باردا قىزعانىشتىڭ دا قاتار ءجۇرۋى ءومىر زاڭدىلىق. جىبەك ارۋعا بۇرىننان عاشىق سول اۋىلدىڭ بەكەجان ەسىمدى باتىرى دا سۇلۋدان دامەلى كوڭىلىن جاسىرماي، ماحاببات ءۇشىن اشىق ايقاسقا تۇسەدى. قايشىلىققا تولى كۇرەستىڭ سوڭى ورنى تولماس وكىنىشكە ۇلاسادى.. .
