فرانسۋزدىڭ اتاقتى عالىمى قازاقستان مادەنيەتى تۋرالى كىتاپ جازىپ جاتىر
«100 جاڭا وقۋلىق قازاق جاستارىن كەمەل بىلىمگە جەتەلەۋمەن قاتار الەمدەگى ايگىلى عالىمدارعا قازاقستان دەگەن عاجايىپ الەمدى اشتى. ءبىز اۋدارعان كىتاپتىڭ اۆتورى رەمي حەسس قازاقشا وقۋلىقتىڭ العىءسوزىن ءوزى جازىپ بەردى. ول سوزىندە بىلاي دەيدى: «وزگە مادەنيەتكە بويلاپ، ونى انا تىلىندە سويلەتۋ ەرەكشە كۇردەلى پروتسەسس. وسىعان دەيىن مەنىڭ ەڭبەكتەرىم 12 تىلگە اۋدارىلدى. مەن ءۇشىن قازاق ءتىلى تاعى ءبىر جاڭا مادەنيەتكە جول اشقان قاقپاعا اينالىپ وتىر» دەدى. استانادا وتكەن ارنايى كونفەرەنسياعا العاشقى 18 كىتاپتىڭ اۆتورلارىنىڭ ءبىرى رەتىندە رەمي حەسس تە قاتىسقان ەدى. ءبىز ءوزىمىز اۋدارعان كىتاپتىڭ اۆتورىمەن سۇحباتتاسىپ، وي بولىسۋگە مۇمكىندىك الساق، ول قازاقستاندى كورىپ اڭ- تاڭ بولدى. ونى ەلىنە بارعاننان كەيىن بىزگە جازعان حاتىندا اشىق ايتتى»، - دەدى ا. رىسكيەۆا بۇگىن «جاڭا گۋمانيتارلىق ءبىلىم. قازاق تىلىندەگى 100 جاڭا وقۋلىق» جوباسى اياسىندا جارىق كورگەن كىتاپتاردىڭ تانىستىرىلىمىندا.
وسى رەتتە ا. رىسكيەۆا وزىمەن بىرگە الىپ كەلگەن سول حاتتان جينالعاندارعا ءۇزىندى وقىپ بەردى.
«بۇعان دەيىن قازاقستان تۋرالى بىلەتىنىم از ەدى. سوندىقتان كەلەر كەزدە قوبالجىعانىم راس. الايدا استانانى العاش كورگەنىمدە جانە سىزدەردىڭ ەلدەرىڭىزدە اتقارىلىپ جاتقان جۇمىستارمەن تانىسىپ، جاستارمەن سۇحباتتاسقاندا مۇندا مادەني ريەۆوليۋتسيانىڭ قازانىندا قايناپ جاتقان گيپەرزاماناۋي حالىققا تاپ بولعانىمدى ءتۇسىندىم. بۇل ساپارىم مەن ءۇشىن ايتۋلى تاريحي ءسات بولدى. وسى بىرگە وزگەشە سەزىم مەنى كەنەتتەن جاسارتىپ جىبەرگەندەي» دەپ جازدى عالىم. استانانىڭ بۇگىنگى تاماشا كەلبەتى، جاس عالىمداردىڭ ونىڭ كىتابىن قازاق تىلىنە تىكەلەي اۋدارىلىپ جاتقاندىعى، جالپى قازاق جاستارىنىڭ ءبىلىمى، جالپى ەلىمىزدە ءجۇرىپ جاتقان رۋحاني جاڭعىرۋ فرانتسۋز ارىپتەسىمىزدى ەرەكشە تاڭقالدىردى. ونىڭ ءبىزدىڭ ەلگە سۇيسىنگەندىگى، ءتانتى بولعاندىعى سونشالىق قازاقستاننىڭ زاماناۋي مادەنيەتى مەن ۇلى اباي حاقىندا كىتاپ جازۋعا بەل بۋدى. ءتىپتى سول استانادا جۇرگەن كەزىندە- اق 20 بەتىن جازىپ، بىزگە قالدىردى»، - دەدى ول.
ونىڭ سوزىنە قاراعاندا، فرانسۋز عالىمى قازاق تىلىندە جارىق كورەتىن ءوز كىتابىن وقۋ ارقىلى قازاق ءتىلىن ۇيرەنۋگە بەل بۋىپ وتىرعاندىعىن ايتقان.
اۆتور: مارلان جيەمباي
