قازاقستان بانكتەرىنە حاكەرلەر شابۋىلى كوبەيۋى مۇمكىن - ۇ ق ك

استانا. قازاقپارات - بانكتەردىڭ اقپاراتتىق جۇيەلەرىنە ۆيرۋستىق شابۋىلداردىڭ كۇشەيۋى بولجانىپ وتىر. بۇگىن استانادا كيبەرشابۋىلدارعا توسقاۋىل قويۋعا ارنالعان فورۋمدا ۇ ق ك- نىڭ مەملەكەتتىك تەحنيكالىق قىزمەتىندەگى زياندى كودتاردى زەرتتەۋ زەرتحاناسىنىڭ جەتەكشىسى ولەگ بيل وسىلاي ءمالىم ەتتى،

 دەپ حابارلايدى قازاقپارات.

«مەملەكەتتىك ەمەس سەكتورداعى ءىرى ۇيىمدار ءبىزدىڭ كومەگىمىزگە جۇگىنبەيتىنى وكىنىشتى. سونىمەن قاتار مەملەكەتتىك ۇيىمدار دا وزدەرىنىڭ پروبلەمالارىمەن بىزگە كەلمەيدى. وتكەن جىلى ءدال وسى شارادا ءبىرقاتار بولجامداردى ايتقان بولاتىنمىن. مىسالى، بانكتەرگە جاسالاتىن شابۋىلدارعا توقتالسام، بۇل تۇرعىدا كليەنتتەر، ىشكى پروتسەستەر، پوستەرمينالدار، بانكوماتتار، ساۋدا نۇكتەلەرى سەكىلدى بارلىق سەكتورلار قامتىلدى. بولجامىم ءدال كەلىپ، وسى قاتەرلەر قازاقستانعا كەلدى. ءبىز بىلەمىز، ەلىمىز بانكتەرىنە قاتەرلى شابۋىلداردىڭ ءبىرى ورىن الدى. وسى ورايدا بۇل شابۋىلدىڭ ءوسىمىن بولجاپ وتىرمىز. ازىرگە، ءبىزدى رەسەي قۇتقارىپ كەلەدى. نەگە؟ سەبەبى ولاردا ءالسىز قورعالعان ۇساق بانكتەر وتە كوپ. سوندىقتان حاكەرلەر سالىستىرمالى تۇردە ءبىزدىڭ ءىرى بانكتەرگە شابۋىل جاساۋدى قاجەتسىنبەي تۇر»، - دەپ توقتالدى و. بيل.

ونىڭ سوزىنە قاراعاندا، وزگە دە بولجامدار ورىندالعان كورىنەدى. ماسەلەن، ماڭىزدى نىساندارعا شابۋىل جاساۋدىڭ ءادىسى وزگەرگەن، ياعني حاكەرلەر قورعانىستى اينالىپ وتۋگە ماشىقتانىپ الدى. بۇل تۇرعىدا وڭتۇستىك كورەيادا ءىرى كومپانيانىڭ ينفراقۇرىلىمى ىستەن شىعىپ قالدى. اتاپ ايتقاندا، حاكەرلەرگە اقشا تولەسە، ولار كەز كەلگەن كاسىپورىننىڭ اقپاراتتىق جۇيەسىن بۇزۋعا قاۋقارلى.

 بۇدان بۇرىن حابارلانعانداي، فورۋم بارىسىندا قورعانىس جانە اەروعارىش مينيسترلىگى اقپاراتتىق قاۋىپسىزدىك كوميتەتى ءتوراعاسىنىڭ ورىنباسارى رۋسلان ءابدىقالىقوۆ ەلىمىزدە كيبەرشابۋىلدار تولقىنى كۇشەيۋى مۇمكىن ەكەنى ايتقان بولاتىن.

اۆتور: رۋسلان عابباسوۆ