اقتاۋلىق ايەلدىڭ ۇيىنە ومىرگە قاۋىپتى ورمەكشى كىرىپ كەتكەن

 استانا. قازاقپارات - اقتاۋدا بەسىنشى مولتەك اۋدانىندا تۇراتىن ايەلدىڭ ۇيىنە قاۋىپتى قاراقۇرت ورمەكشىسى كىرىپ كەتكەن. ۋلى جاندىكتى سول ساتتە پاتەردە بولعان قوناقتار بايقاپ قالعان.

بۇل تۋرالى جەرگىلىكتى «لادا» باسىلىمىنا سىلتەپ Stan.kz اقپاراتتىق اگەنتتىگى حابارلايدى.

«مەن قۇربىمنىڭ ۇيىنە جەكە جۇمىستارىممەن كەلدىم. ۇزىندىعى شامامەن 3,5 سانتيمەتر بولاتىن ورمەكشىنى كورىپ قالدىق. قاتتى قورىقتىق. ورمەكشىنى ديحلوفوسپەن ولتىرۋگە تۋرا كەلدى» ، - دەيدى ايەلدىڭ قۇربىسى.

ماڭعىستاۋ وبلىستىق تاريحي- ولكەتانۋ مۇراجايى، تابيعات ءبولىمىنىڭ مامانى ليۋدميلا بىكوۆا قاراقۇرت شاعىپ العان جاعدايدا ۋ تاراپ كەتپەس ءۇشىن زاقىمدالعان جەردى قىسىپ، جوعارى كوتەرۋ قاجەت. سوسىن بىردەن دارىگەر شاقىرعان ءجون.

«ورمەكشىنىڭ ۇرعاشىسى ەركەگىنە قاراعاندا ءىرى ءارى ۋلى بولادى. ولار تەك ءبىر ماۋسىم ءومىر سۇرەدى. ەگەر ورمەكشى ۇيگە كىرىپ كەتسە، ونىڭ كوزىن جويۋ قاجەت. تەك ابايلاپ. شاعىپ العان جاعدايدا، تەز ارادا دارىگەر شاقىرۋ كەرەك. ولار ۋعا قارسى ەكپە سالادى» ، - دەيدى بىكوۆا.

 ايتا كەتەيىك، وتكەن جىلدىڭ شىلدە ايىندا قاراقۇرت شاعىپ العان ماڭعىستاۋ وبلىسىنىڭ 30 جاستاعى تۇرعىنى زارداپ شەكتى. ەر ادام قولىندا وتىرعان جاندىكتى بايقاماعان. جاندىك شاعىپ العان سوڭ، زارداپ شەككەن ازاماتتىڭ ءىشى تومەن سالبىراپ، بەلى اۋىرىپ، تىنىسى تارىلعان.