ەلباسى مۇناي باعاسى جايىندا: نارىقتى بولجاي المايسىڭ

استانا. قازاقپارات - ەلباسى نۇرسۇلتان نازاربايەۆ قازاقستان نە ءۇشىن يندۋستريالىق دامۋ جولىن تاڭداعانىن ءتۇسىندىردى، دەپ حابارلايدى قازاقپارات.

 «ءبىز شيكىزاتتىق ەمەس سەكتور قۇرۋ ءۇشىن 6 جىل يندۋستريالاندىرۋمەن اينالىسىپ كەلەمىز. مۇناي مەن گازىمىز، تەمىر، قورعاسىن، مىرىش، التىن، كۇمىسىمىز بار. ءبىراق، نارىقتا باعا كونيۋنكتۋراسى وزگەرىپ وتىرادى. مۇنىڭ بارلىعى دا بيرجالىق تاۋارلار. بۇگىن بىلاي، ەرتەڭ ولاي. كەزىندە مۇنايدىڭ ءبىر باررەلى 140 دوللار بولسا، ودان كەيىن 30-عا ءتۇسىپ كەتتى، قازىر 50-60 دوللار بولىپ تۇر. ال ەرتەڭ قالاي بولارىن بىلمەيمىز»، - دەپ اتاپ ءوتتى مەملەكەت باسشىسى «جاڭا گۋمانيتارلىق ءبىلىم. قازاق تىلىندەگى 100 جاڭا وقۋلىق» جوباسى اياسىندا قازاق تىلىندە شىققان وقۋلىقتاردىڭ تانىستىرىلىمىندا.

ەلباسى وسى رەتتە، بۇگىندە الەمدە تاقتاتاس گاز ءوندىرۋ دامىپ، بالاما ەنەرگياعا كوشۋ قارقىن الىپ كەلە جاتقانىن ەسكە سالدى.

«سوندىقتان بىزگە باسقا ەكونوميكا قاجەت. ءبىز 6 جىلدا 120 جاڭا كاسىپورىن اشتىق. بۇل بىزگە جەتىسپەي تۇرعان مۇلدەم باسقا كادرلىق دەڭگەي، باسقا جالاقى، باسقا ادامدار، تەحنيكالار، ينجەنەرلەر. سوندىقتان دا بارلىعى وڭاي ەمەس»، - دەدى نۇرسۇلتان نازاربايەۆ.

اۆتور: مارلان جيەمباي