نۇرسۇلتان نازاربايەۆ: لاتىن الىپبيىمەن كۇندەلىكتى جازىپ ۇيرەنىپ ءجۇرمىن
«قازاق ءتىلىن لاتىن الىپبيىنە كوشىرۋدى باستادىق. ول جونىندە ۇلكەن اڭگىمە، حالىقتىڭ اراسىندا تالقىلاۋ بولدى. ەلدىڭ پىكىرىن جينادىق. عالىمداردىڭ، ءتىل مامانداردىڭ ۇسىنىستارىن جينادىق. بۇل ەلىمىز ءۇشىن، حالقىمىز ءۇشىن تەڭدەسى جوق وقيعا دەپ ساناۋعا بولادى»، - دەدى مەملەكەت باسشىسى «جاڭا گۋمانيتارلىق ءبىلىم. قازاق تىلىندەگى 100 جاڭا وقۋلىق» جوباسى اياسىندا جارىق كورگەن وقۋلىقتاردىڭ تانىستىرىلىمى بارىسىندا.
ەلباسى تاۋەلسىزدىكتىڭ ارقاسىندا، وسى 26 جىلدىڭ ىشىندە قول جەتكىزگەن جەتىستىكتەرگە دە توقتالدى. ءبىرىنشى جەتىستىك رەتىندە قازاقستاننىڭ الەم قاۋىمداستىعىنىڭ تورىنەن ورىن العان ەلگە اينالعانىن ايتتى. ال قازاق حالقى تۇڭعىش رەت ءوز ساناسىمەن، ءوز ويىمەن ەلورداسىن سالعانىن ەكىنشى جەتىستىك دەپ اتادى.
«بارلىق حاندارىمىز وسىنداي قالا سالۋدى ارمانداپ كەتكەن. ول ارمانعا ءبىز جەتتىك. ءۇشىنشىسى ەشكىمنىڭ ىقپالىنسىز تاۋەلسىز، ەگەمەن ەل رەتىندە ەشكىمنىڭ ماجبۇرلەۋىنسىز، ءوز ەركىمىزبەن ءالىپبيىمىزدى، جازۋىمىزدى تاڭدادىق. ءار ەلدىڭ تاريحىندا مۇنداي ماسەلە ەستە قالارلىق ۇلكەن وقيعا سانالادى. ءبىز ەلىمىز كوش باسىندا بولسىن، انا ءتىلىمىز كەمەلدەنە ءتۇسسىن دەپ وسىنى جاسادىق. قازىر ونى بەكىتتىك. ەندى ەپتەپ- ەپتەپ ەنگىزۋىمىز كەرەك. وزىمدە كۇندە وتىرىپ الىپ ابايدىڭ سوزدەرىن، ويلارىمدى سول الىپبيمەن جازامىن. مەنىڭشە، ونشا قيىن ەمەس»، - دەدى نۇرسۇلتان نازاربايەۆ.
ايتا كەتەيىك، استاناداعى نازاربايەۆ ورتالىعىندا «قازاق تىلىندەگى 100 جاڭا وقۋلىق» جوباسى اياسىندا اۋدارىلعان العاشقى كىتاپتاردىڭ تانىستىرىلىمى ءوتىپ جاتىر.
جيىندا ءسوز سويلەگەن ۇلتتىق اۋدارما بيۋروسىنىڭ اتقارۋشى ديرەكتورى راۋان كەنجەحان ۇلى قازاق تىلىنە اۋدارىلعان 18 وقۋلىقتىڭ جالپى تارالىمى 47 ميلليوننان اساتىندىعىن ايتتى.
سونىمەن قاتار، ول امەريكالىق ستۋدەنتتەر 280 دوللارعا ساتىپ الاتىن وقۋلىقتى قازاقستاندار تەگىن وقيتىندىعىن اتاپ ءوتتى.
