اق ءۇي: ترامپ سيرياعا قاتىستى ءالى شەشىم قابىلداعان جوق

استانا. قازاقپارات - «ا ق ش پرەزيدەنتى دونالد ترامپ سيرياعا اسكەري سوققى بەرۋ تۋرالى تۇپكىلىكتى شەشىمىن ازىرگە قابىلداعان جوق، ول ۆاشينگتون مەن وداقتاستارى ءىس-ارەكەتىنىڭ ءبىر نۇسقاسى بولىپ تۇر» دەپ مالىمدەدى اق ءۇيدىڭ رەسمي وكىلى سارا ساندەرس.

ول ترامپتىڭ Twitter- دە رەسەيدى زىمىران شابۋىلى جاسالاتىنى تۋرالى ەسكەرتۋىن «ىقتيمال ءىس-قيمىلداردىڭ ءبىرى» دەپ اتادى.

ساندەرس ا ق ش سيريانىڭ دۋما قالاسىندا جاسالعان حيميالىق شابۋىل پرەزيدەنت باشار اساد اسكەرىنىڭ ءىسى ەكەنىنە سەنىمدى ەكەنىن جانە ۆاشينگتون وعان سيريانىڭ حيميالىق قارۋ ارسەنالىن جويۋعا ۋادە بەرگەن رەسەي جاۋاپتى دەپ بىلەتىنىن ايتتى.

اق ءۇي وكىلى رەسەي سيريادا «جاعىمسىز كىسى» سياقتى ارەكەت ەتەتىن ايتتى. ونىڭ سوزىنشە، ترامپ دەگەنمەن جاعداي وزگەرىپ، رەسەي ىنتىماقتاستىققا ۇمتىلادى دەپ ۇمىتتەنەدى.

سارا ساندەرستىڭ سوزىنشە، ترامپ وداقتاستارى - ۇلى بريتانيا، فرانسيا، يزرايل جانە بىرنەشە اراب ەلىمەن بىرلەسە ءىس-قيمىل جاساۋ جونىندە كەڭەسىپ جاتىر.

بريتاندىق ب ا ق- تىڭ حابارلاۋىنشا، ۇلى بريتانيا سۇڭگۋىر قايىقتارى سيرياداعى نىساندارعا ىقتيمال سوققى جاساۋعا قاتىسۋ ءۇشىن سيريا جاعالاۋىنا اتتانىپ كەتكەن.

رەسەي دۋما قالاسىندا حيميالىق شابۋىل جاسالعان جوق جانە ول تۋرالى اقپاراتتى «ارانداتۋ» دەپ بىلەدى. حيميالىق قارۋعا تىيىم سالۋ جونىندەگى حالىقارالىق ۇيىم حيميالىق شابۋىل تۋرالى اقپاراتتى 16- ساۋىردە تالقىلايدى. ۇيىم سيرياعا ارنايى ميسسياسىن جىبەرۋگە دايىن.

«ازاتتىق»