ەلوردانىڭ ۇزدىك مەملەكەتتىك قىزمەتكەرلەرى انىقتالادى

استانا. قازاقپارات - استانادا رەسپۋبليكالىق «ەڭ ۇزدىك مەملەكەتتىك قىزمەتكەر» بايقاۋىنىڭ ايماقتىق كەزەڭى اياقتالدى، دەپ حابارلايدى ەلوردا اكىمدىگىنىڭ رەسمي سايتى.

ايماقتىق جانە رەسپۋبليكالىق كەزەڭدەردەن تۇراتىن «ەڭ ۇزدىك مەملەكەتتىك قىزمەتكەر» بايقاۋى مەملەكەتتىك قىزمەتكەرلەردى قوسىمشا ىنتالاندىرۋ ماقساتىندا جىل سايىن «مەملەكەتتىك قىزمەتكەر» كۇنى قارساڭىندا ۇيىمداستىرىلادى. بيىلعى بايقاۋ ق ر مەملەكەتتىك قىزمەت ورگاندارىنىڭ 20 جىلدىعىنا ورايلاستىرىپ وتىر.

ق ر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ استانا قالاسى بويىنشا دەپارتامەنتى جەتەكشىسىنىڭ ورىنباسارى رومان كيم بايقاۋ قاتىسۋشىلارىن ىرىكتەۋ تالاپتارىنىڭ قاتاڭداي تۇسكەندىگىن العا تارتتى.

«استانا قالاسى بويىنشا بايقاۋعا قاتىسۋعا 45 مەملەكەتتىك قىزمەتكەر نيەت ءبىلدىردى. ولاردىڭ تەك 14 ءى عانا العاشقى كەزەڭگە ءوتىپ، ستراتەگيالىق باعدارلامالىق قۇجاتتار بويىنشا تەست تاپسىرسا، بۇگىنگى ەكىنشى كەزەڭگە 9 جولداما الدى. بايقاۋعا قاتىسۋشىلار وزدەرىنىڭ كاسىبي جانە باسقارۋشىلىق قاسيەتتەرىنىڭ جوعارى دەڭگەيىن، مەملەكەتتىك قىزمەتكە دەگەن ادالدىعىن، كوماندادا جۇمىس ىستەۋ قابىلەتى مەن باستاماشىلدىعىن كورسەتۋى ءتيىس»، - دەدى رومان كيم.

«ەڭ ۇزدىك مەملەكەتتىك قىزمەتكەر» بايقاۋىندا استانا قالاسىنىڭ نامىسىن قورعايتىن ۇمىتكەرلەردىڭ ەسىمدەرى 16- مامىردا بەلگىلى بولادى.

اقىرعى سايىستا قاتىسۋشىلار رەسپۋبليكالىق كونكۋرس كوميسسياسىنىڭ نازارىنا وزدەرىنىڭ جوبالىق جۇمىستارىن ۇسىنادى.

ايتا كەتەيىك، «ەڭ ۇزدىك مەملەكەتتىك قىزمەتكەر» بايقاۋىنا اكىمشىلىك جانە تارتىپتىك جاۋاپكەرشىلىككە تارتىلماعان، سونداي-اق، مەملەكەتتىك قىزمەت سالاسىندا كەم دەگەندە 1 جىل جۇمىس ىستەگەن ازاماتتار قاتىسا الادى.