وسكەمەندەگى كارل ماركس داڭعىلىنا قازىبەك ءبيدىڭ اتى بەرىلدى
بۇل تۋرالى وبلىستىق قوعامدىق كەڭەستىڭ كەزەكتى وتىرىسىندا ايتىلدى.
«№19-اۋدانداعى كارل ماركس داڭعىلىنا قازىبەك ءبيدىڭ اتىن بەرۋ تۋرالى ۇسىنىستى العاش وبلىستىق سوتتىڭ ءتوراعاسى مەن اقساقالدار كەڭەسى بەرگەن بولاتىن. داڭعىلدىڭ ۇزىندىعى 3 شاقىرىم، ەنى 100 مەتر. بويىندا 41 كوپقاباتتى ءۇي تۇر، 5000 عا جۋىق تۇرعىنى بار. ءبىر جاق قاپتالىندا وبلىستىق سوت عيماراتى ورنالاسقان. وسىنداي داڭعىلعا تاۋكە حاننىڭ كەڭەسشىسى بولعان، قارا قىلدى قاق جارعان قازىبەك ءبيدىڭ ەسىمىن بەرۋ ۇسىنىسىن تۇرعىندار دا ءبىراۋىزدان قولدادى. بۇل ايگىلى ءبيدىڭ 350 جىلدىق تويىنا ۇلكەن تارتۋ بولماق» - دەيدى وبلىستىق تىلدەردى دامىتۋ باسقارماسى باسشىسىنىڭ مىندەتىن اتقارۋشى روزا تولەمىسوۆا.
بۇدان بولەك وسكەمەننىڭ 20 كوشەسى جاڭا اتاۋلارعا يە بولدى. ولار بۇگىنگە دەيىن تەك سانمەن بەلگىلەنىپ كەلگەن بولاتىن. كوشەلەرگە شۇعىلا، اقنيەت، راۋان، كۇنباتىس، ورنەك، شۋاقتى سياقتى بەيتاراپ اتاۋلار تاڭداپ الىنىپتى.
سونداي-اق، بورودۋليحا اۋدانىنىڭ ۆوزنەسەنوۆكا اۋىلى قىزىلتاي بولىپ، پرولەتاركا اۋىلى اقشي بولىپ قايتا اتالدى. ال ۇلان اۋدانىنىڭ 17 شاقىرىم اتتى ەلدى مەكەنى سارىوزەك دەگەن اتاۋعا يە بولدى.
«بۇل ۇسىنىستار رەسپۋبليكالىق ونوماستيكالىق كوميسسيا وتىرىستارىندا دا قولداۋ تاپتى. ەندى ادىلەت ورگانىندا تىركەۋ عانا قالدى. بۇعان قوسا شەمونايحا اۋدانىنىڭ اۋىلدارىنداعى 10 كوشە قازاقي اتاۋلارمەن قايتا اتالىپ، ۇلان اۋدانىنىڭ جانۇزاق اۋىلىنداعى 4 اتسىز كوشەگە اتاۋ بەرىلمەك. بورودۋليحا اۋدانىنىڭ بىرنەشە اۋىلىندا دا كوشەلەر كەڭەستىك يدەولوگيادان ارىلىپ، زامان تالابىنا ساي ات الدى. ولاردى دا ادىلەت ورگاندارىنا تىركەۋ كەرەك» - دەيدى روزا تولەمىسوۆا.
ءۇرجار اۋدانىنداعى ميرزويان كوشەسىنە الاش ارىسى وتىنشى ءالجانوۆتىڭ ەسىمى بەرىلسە، سەمەيدەگى لەنين كوشەسىن «ماڭگىلىك ەل» دەپ اتاۋ ۇسىنىلعان. بۇل ۇسىنىس جەرگىلىكتى دەڭگەيدە تولىق ماقۇلدانىپ، رەسپۋبليكالىق ونوماستيكالىق كوميسسيا قاراۋىنا جىبەرىلمەك.
