چەمپيوندار ليگاسى. شيرەك فينالى: «رەال مادريد» ءوز الاڭىندا «يۋۆەنتۋستان» جەڭىلدى

استانا. قازاقپارات - ۋ ە ف ا چەمپيوندار ليگاسىنىڭ شيرەك فينالىندا «رەال مادريد» ءوز الاڭىندا «يۋۆەنتۋس» كومانداسىن قابىلدادى، دەپ حابارلايدى قازاقپارات ءتىلشىسى.

يتاليالىق قوناقتار حورۆات شابۋىلشىسى ماريو ماندجۋكيچتىڭ 2-مينۋتتا جانە 37-مينۋتتا باسپەن سوققان قوس گولىنىڭ ارقاسىندا ءبىرىنشى تايمدى جەڭىسپەن اياقتادى.

ەكىنشى تايمدا تاعى ءبىر گول سوعىپ، جالپى ەسەپتى تەڭەستىردى. ويتكەنى تۋريندەگى العاشقى ويىندا مادريدتىكتەر 0:3 ەسەبىمەن جەڭىسكە جەتكەن بولاتىن.

سودان كەيىن ءىس ناسىرعا شاپتى. ءۇش گولدىق ايىرمادان ايىرىلىپ قالعان الاڭ يەلەرى بۇكىل الاڭدا مايدان شەبىن قۇرىپ، شابۋىلعا شىعا بەردى. ال اپپەنين تۇبەگىنىڭ وكىلدەرى قارىمتا شابۋىلعا يەك ارتا باستادى. ويىنداعى نەگىزگى ۋاقىت وسىلاي اياقتالدى.

قوسىمشا 3 مينۋت تا اياقتالار ساتتە اقتىق شابۋىلعا شىققان «رەال مادريد» ويىنشىلارى قارسىلاس قورعاۋشىلارىن قاتەلەسۋگە ءماجبۇر ەتىپ، پەنالتي تەبەتىن بولدى. ونىڭ ۇستىنە، تورەشىگە ورەسكەل دورەكى قاتىناس تانىتقان قاقپاشى بۋففون قىزىل قاعاز الىپ، الاڭنان قۋىلدى. ال كريشتيانۋ رونالدۋ 11 مەترلىك نۇكتەدەن ءمۇلت كەتپەي، الاڭ يەلەرىن جارتىلاي فينالعا الىپ شىقتى.

اۆتور: نۇرلان تۇياقوۆ