كاسىپكەرلىكتىڭ دامۋىنا كەدەرگى كەلتىرىپ وتىرعان پروبلەمالاردى جويىپ جاتىرمىز - قۇلىبايەۆ

كوكشەتاۋ. قازاقپارات - قازاقستان رەسپۋبليكاسى «اتامەكەن» ۇلتتىق كاسىپكەرلەر پالاتاسى پرەزيديۋمىنىڭ ءتوراعاسى تيمۋر قۇلىبايەۆ جۇمىس ساپارىمەن كوكشەتاۋ قالاسىندا بولىپ، وڭىردە كاسىپكەرلىكتى دامىتۋدىڭ ءتيىمدى باعىتتارى جانە تۇيىتكىلدى ماسەلەلەرىن شەشۋ جولدارىن قاراستىرعان كەڭەيتىلگەن ءماجىلىس وتكىزدى، دەپ حابارلايدى قازاقپارات ءتىلشىسى.

وڭىرلىك كاسىپكەرلەر پالاتاسىنىڭ كەڭەسىندە وتكەن جيىنعا ايماق باسشىسى مالىك مىرزالين، وبلىستىق ءماسليحات دەپۋتاتتارى، وڭىرلىك كاسىپكەرلەر پالاتاسى مەن «دامۋ» كاسىپكەرلىكتى دامىتۋ قورىنىڭ وكىلدەرى، وبلىستىق دەپارتامەنتتەر، باسقارمالار جانە ءتۇرلى ۆەدومستۆو باسشىلارى قاتىستى. ماجىلىستە كاسىپكەرلەر مەن مەملەكەتتىك ورگاندار اراسىندا تۇسىنىسپەۋشىلىكتەن تۋىندايتىن داۋلى كەيبىر ماسەلەلەر جانە مەملەكەتتىك جەكەمەنشىك سەرىكتەستىك، اۋىل شارۋاشىلىعى كووپەراتيۆتەرىن قۇرۋ، شاعىن جانە ورتا بيزنەستى دامىتۋ ءسوز بولدى.

«پالاتا قۇرىلعان بەس جىلدىڭ ىشىندە بيزنەس قۇرىلىمدارىمەن بايلانىس دۇرىس جولعا قويىلدى. وڭىرلەردەگى ۇلتتىق پالاتا وكىلدەرى كاسىپكەرلىكتىڭ دامۋىنا كەدەرگى كەلتىرىپ وتىرعان كوپتەگەن پروبلەمالاردى انىقتاپ، شەشۋگە اتسالىسۋدا»، - دەي كەلە، تيمۋر قۇلىبايەۆ جەرگىلىكتى بيلىك وكىلدەرىن كاسىپكەرلىكتى دامىتۋ باعىتىندا ىنتىماقتاسا جۇمىس ىستەۋگە شاقىردى.

پرەزيديۋم ءتوراعاسىنىڭ ايتۋىنشا، سوڭعى بەس جىلدىڭ ىشىندە كاسىپكەرلەردەن 22 مىڭ ءوتىنىش تۇسسە، ونىڭ 40 پايىزى وڭ شەشىمىن تاپقان. كاسىپكەرلەردىڭ قۇنى 92 ميللياردتان استام تەڭگە بولاتىن مۇلىكتىك قۇقىعى قورعالدى. ونىڭ ىشىندە، ايىپپۇلدار، ءوسىماقى جانە مۇلىكتى ساقتاۋ ءۇشىن تولەنەتىن اقىلار بار. سونىمەن قاتار ۇلتتىق پالاتانىڭ قاتىسۋىمەن جاڭا سالىق كودەكسى ازىرلەندى. اسىرەسە، مەملەكەتتىك جەكەمەنشىك سەرىكتەستىگى جانە «باستاۋ» جوبالارىنىڭ جۇزەگە اسىرىلۋىنا ىقپال ەتتى.

وسى ورايدا وبلىس اكىمى مالىك مىرزالين ءوڭىر كاسىپكەرلەرىنە بارىنشا قولداۋ كورسەتىلىپ، ولاردىڭ ماسەلەلەرىن تالقىلاۋ جانە شەشۋ جولدارىن ىزدەستىرۋ باعىتىندا اۋقىمدى جۇمىس اتقارىلىپ جاتقانىن اتاپ ءوتتى. بۇل تۋرالى وڭىرلىك كاسىپكەرلەر پالاتاسىنىڭ باسشىسى قايرات سۇلتانوۆ ءوز بايانداماسىندا كەڭىنەن تاراتىپ، ايتىپ بەردى. ونىڭ ايتۋىنشا، قازىرگى كەزدە، وبلىستا كاسىپكەرلىك سۋبەكتىلەرىنىڭ سانى 42 مىڭدى قۇرايدى. سوڭعى جىلدارى ساۋىقتىرۋ، ەكولوگيا، اڭشىلىق، بالىق اۋلاۋ جانە تاۋ-شاڭعىسى باعىتى بويىنشا كاسىپكەرلىكتى دامىتۋعا زور كوڭىل ءبولىنىپ كەلەدى. وتكەن جىلى وڭىرلىك كاسىپكەرلەر پالاتاسى تاراپىنان جەرگىلىكتى كاسىپكەرلەردەن تۇسكەن 390 شاعىمنىڭ جارتىسى وڭ شەشىمىن تاپتى.

سونىمەن قاتار ساپار اياسىندا پرەزيديۋمىنىڭ ءتوراعاسى كوكشەتاۋ قالاسىنداعى «اسىل ارمان» جاۋاپكەرشىلىگى شەكتەۋلى سەرىكتەستىگىندە بولىپ، ىرگەلى ءوندىرىس ورنىنىڭ جۇمىسىمەن تانىستى.