قازاقستانداعى تەرى بۇيىمدارى كولەڭكەلى اينالىمنان شىعارىلا باستادى

استانا. قازاقپارات - قازاقستانداعى تەرى بۇيىمدارى كولەڭكەلى اينالىمنان شىعارىلىپ، سالىق تولەۋشىلەر بيۋدجەتتىك ءتۇسىمدى ايتارلىقتاي ارتتىرا باستاعان.

 بۇل تۋرالى بۇگىن ەلورداداعى تەرى بۇيىمدارىن (قىمبات تونداردى) ساتاتىن ساۋدا نۇكتەلەرىنە رەيد جۇمىسى بارىسىندا ق ر ق م مەملەكەتتىك كىرىستەر كوميتەتىنىڭ باس ساراپشىسى نۇرداۋلەت ورىنتاي ءمالىم ەتتى،

دەپ حابارلايدى «قازاقپارات» ح ا ا ءتىلشىسى.

«2017 -جىلدىڭ 27 -قاراشاسىندا قازاقستاندا تەرى بۇيىمداردى تاڭبالاۋ (ماركيروۆكا) بويىنشا پيلوتتىق جوبا ىسكە اسىرىلعان. ونىڭ نەگىزىندە كوميتەت تاراپىنان تەرى بۇيىمداردى تاڭبالاۋ بويىنشا سالىق تولەۋشىلەرگە ءۇش اي ۋاقىت بەرىلگەن. جوبا بويىنشا ءبىز تەرى بۇيىمدارىنىڭ ەسەبى مەن تاڭبالاۋى جۇرگىزىلىپ وتىراتىن ءتيىستى اقپاراتتىق جۇيەنى جاساپ شىعاردىق. سونىمەن قاتار، تۇتىنۋشىلار ساتىپ العىسى كەلگەن تەرى بۇيىمدارى تۋرالى تولىققاندى اقپارات سالىنعان موبيلدىك قوسىمشا جاسالدى. موبيلدىك قوسىمشا ارقىلى تاۋاردىڭ ساپا بويىنشا قۇرامىنان اقپارات الا الاسىز»، - دەيدى نۇرداۋلەت ورىنتاي.

كوميتەت وكىلىنىڭ ايتۋىنشا، وسى جوبا ىسكە اسىرىلعان كەزدەن باستاپ تەرەڭ تالداۋ جۇرگىزىلگەن.

«قازىرگە دەيىن 300 مىڭعا جۋىق تەرى بۇيىمداردى تاڭبالاۋعا ءوتىنىم بەرىلدى. ءاۋ باستا ءبىز ءوتىنىم بەرىلەتىن تەرى بۇيىمداردىڭ سانى ارى كەتسە 100 مىڭعا جەتەر دەپ بولجاعانبىز. الايدا ءوزىڭىز كورىپ وتىرعانداي، بولجامدى كورسەتكىش 200 پايىزعا اسىپ كەتكەن. ولاردىڭ ىشىندە ءبىزدىڭ بولجام بويىنشا، 200 مىڭ تەرى بۇيىمى كولەڭكەلى اينالىمدا ءجۇر. وسىلايشا، بۇرىن بىلىنبەگەن توندار كولەڭكەلى نارىقتان سىرتقا شىعا باستادى. سايكەسىنشە، بۇل ءبىزدىڭ بيۋدجەتكە كەلەتىن ءتۇسىمدى ارتتىرىپ جىبەردى»، - دەيدى ول.

جوبانىڭ بيۋدجەتكە اسەر ەتكەنى دە راس. كوميتەت وكىلىنىڭ ايتۋىنشا، باج سالىعى مەن سالىقتار سوڭعى ايلاردا 47 ميلليون تەڭگەگە كوبەيگەن.

«تاڭبالاۋدىڭ تاجىريبەسى كورسەتىپ وتىرعانداي، بۇل مەحانيزم كولەڭكەلى اينالىمعا ايتارلىقتاي توسقاۋىل قويادى. ونىڭ نەگىزگى باسىمدىعى - تۇتىنۋشىعا تاۋاردىڭ ساپاسى تۋرالى شىنايى اقپارات بەرە الۋى. تەرى بۇيىمدارىن ساتىپ العىسى كەلەتىن كەز كەلگەن ادام «پلەي ماركەتكە» كىرىپ، موبيلدىك قوسىمشانى جۇكتەپ الا الادى. موبيلدىك قوسىمشا «Маркировка KZ» دەپ اتالادى. وسى قوسىمشا كيس ءنومىرى ارقىلى نەمەسە تاۋاردىڭ كۋاردكودىن سكانەرلەۋ جولىمەن تاۋاردىڭ ساپاسىن تەكسەرە الاسىز»، - دەيدى ول.

قازىرگى ۋاقىتتا سالىق تولەۋشىلەر قاتاڭ باقىلانىپ، تەكسەرىلىپ جاتقان جوق. ياعني، ولارعا وسى جۇيەنى ۇيرەنىپ، جۇمىسىندا قولدانۋ بەيىمدىلىگىنە ءالى دە ۋاقىت بەرىلگەن.

«قازىر بىلايشا ايتقاندا وقىتۋ ءۇردىسى جۇرگىزىلىپ جاتىر. ال كەلەشەكتە پيلوتتىق جوبا الىنىپ تاستالعاننان كەيىن ءبىز تەكسەرىسكە شىعا باستايمىز. تاڭبالاۋ بويىنشا ول كەزدە باقىلاۋ جۇرگىزىلگەنىمەن، قازىر ولارعا مۇمكىندىك بەرىپ وتىرمىز»، - دەپ ءتۇيدى نۇرداۋلەت ورىنتاي.

اۆتور: ايان بەكەن ۇلى