اسانالى ءاشىموۆتىڭ كەلىنشەگى ابىز اكتەردىڭ بۇرىنعى ايەلىمەن جانە بالالارىمەن قارىم- قاتىناسى جايلى ايتتى
«قازاقستان» ارناسىنىڭ «باقىتتى ايەل» باعدارلاماسىنا سۇحبات بەرگەن ول اكتەردىڭ العاشقى ەكى نەكەسىنەن سۇيگەن ۇرپاقتارى جايلى دا ءسوز ەتتى، دەپ حابارلايدى Stan.kz اقپاراتتىق اگەنتتىگى.
«اسەكەڭنىڭ وتكەن ومىرىنە سىيلاستىقپەن قارايمىن. اسەكەڭ سۇيۋگە تۇرارلىق جان عوي. اسەكەڭ ءۇشىن وقىلعان كىتاپتىڭ ءبىر پاراعىنداي. ارالارىندا ماحاببات بولدى، ۇل دۇنيەگە كەلدى. تاعدىردىڭ جازعانى شىعار، بولەك كەتتى. ءبىراق بالاسى ۇيلەنگەندە تويدا ماعان ءسوز بەرگەندە «اناسى ەمەسپىن» دەپ ايتقانىم راس. ومىرگە اكەلگەن انالارى عوي. ءار بالاعا ءوز اناسىنىڭ ورنى بولەك. ول كەزدە اسەكا (اۆت. كىشكەنتاي اسانالى) بولعان جوق»، - دەيدى باعدات ءاشىموۆا ءاشىموۆتىڭ ۇلىنىڭ ۇيلەنگەن كەزىن ەسكە الىپ.
باعدات ءاشىموۆانىڭ ايتۋىنشا، بۇگىندە اسانالى ءاشىموۆتىڭ الدىڭعى نەكەسىنەن تۋعان ساعينا ەسىمدى قىزى ولارمەن بىرگە تۇرادى.
«مەن تابالدىرىقتى اتتاعان كەزدە ساعيدىڭ ۇلى مەن قىزى 5 جاستا بولاتىن. قازىر ول بالالار 20-دان استى. كەلگەن كەزدە اڭساردى دا، قىزدى دا جاقسى كوردىم. مەكتەبىنە، بالاباقشاسىنا بارامىن. سول بالالارعا دەگەن انالىق سەزىمىم وياندى. ومىرگە اسەكا كەلگەندە، سولار ءوسىردى. قازىر اڭسار ەكەۋىنىڭ ءبىر- بىرىنە دەگەن قارىم- قاتىناسى، باۋىرمالدىعى وتە جوعارى. قازىر ەندى 5 نەمەرەمىز، 2 شوبەرەمىز بار. ال ەندى ساعينا قىزىمىز ەكى جىلدان استى قولىمىزدا. بىلتىر 16-عا تولعان كەزدە تۋعان- تۋىستاردى جيناپ، ەلگە تانىستىردىق. اسەكەڭنىڭ قانى، ءاشىموۆتىڭ ۇرپاعى عوي. بالالاردىڭ ءبارىن جاقسى كورەمىن. ولار دا مەنى «اجەكا» دەپ وتىرادى»، - دەگەن باعدات ءاشىموۆا ساعينانىڭ اناسىمەن دە ارالاسىپ تۇراتىنىن اتاپ ءوتتى.
ونىڭ ايتۋىنشا، 16 جاستاعى بويجەتكەننىڭ اناسى بۇگىندە استانادا تۇرادى. ال ءوز اناسى بولا تۇرا، قىزدىڭ وزدەرىمەن بىرگە تۇرىپ جاتقانىن ءاشىموۆا بىلاي دەپ ءتۇسىندىردى:
«ءبىز سولاي شەشتىك. قىزدىڭ جۇرەگى نازىك قوي. اكەسىنىڭ ۇلكەن ادام ەكەنىن بىلەدى، سونى سەزىنسىن دەدىك. ەكى بالا قوس قاناتىمىز بولسىن دەپ اسەكەڭ ەكەۋمىز بىرگە شەشتىك»، - دەدى ول.
ايتا كەتەيىك، اسانالى ءاشىموۆتىڭ العاشقى جارى مايرا 1993 -جىلى، ال العاشقى نەكەسىنەن تۋعان قوس ۇلى ءمادي مەن ساعي 1999 -جىلى دۇنيەدەن ءوتتى. قازاقستاننىڭ ەڭبەك سىڭىرگەن قايراتكەرى اتانعان ساعي ءاشىموۆتى كوپشىلىك شوقان ءۋاليحانوۆتىڭ ءرولى ارقىلى تانيدى.
http://stan.kz
