نۇرسۇلتان نازاربايەۆ قازاقستان مەن رەسەي قارىم-قاتىناسىن ۇلگى ەتتى
«قازاقستاننىڭ رەسەي فەدەراتسياسىمەن قارىم-قاتىناسى مەملەكەتارالىق بايلانىستىڭ ەتالونى سانالادى جانە ستراتەگيالىق سەرىكتەستىك پەن وداقتاستىقتىڭ جارقىن ۇلگىسى رەتىندە قىزمەت ەتەدى. ءبىزدىڭ تىعىز ىنتىماقتاستىعىمىزدىڭ ارقاسىندا ەۋرازيالىق ەكونوميكالىق وداق ينتەگراتسيالىق بىرلەستىگى تابىستى جۇمىس ىستەپ تۇر»، - دەپ اتاپ ءوتتى قازاقستان پرەزيدەنتى.
مەملەكەت باسشىسى مەملەكەتتەر اراسىنداعى ىنتىماقتاستىقتى ودان ءارى دامىتۋعا باعىتتالعان باعدار ەكى حالىقتىڭ دا بارىنشا جوعارى قولداۋىنا يە بولىپ وتىرعاندىعىن باسا ايتتى.
«رەسەي پرەزيدەنتى ۆلاديمير پۋتينمەن ىزگى جەكە بايلانىستاردى جوعارى باعالايمىن. تاياۋداعى سايلاۋدا ونىڭ جەڭىسى - بۇل رەسەي حالقىنىڭ ەلدى ودان ارى گۇلدەنۋى، گەوساياسي ءرولىنىڭ نىعايۋى جولىنداعى ءوز كوشباسشىنىڭ باعدارىنا دەگەن ەڭ جوعارى كەزەكتى باعاسى، سونىمەن قاتار ونىڭ ەلىنە دەگەن شەكسىز جان-تانىمەن بەرىلۋى دەپ ەسەپتەيمىن»، - دەدى ەلباسى.
نۇرسۇلتان نازاربايەۆ قازاقستان رەسەيمەن اراداعى ەكىجاقتى فورماتتاعى جانە حالىقارالىق كۇنتارتىپ اياسىنداعى بايلانىستارىن ەكى حالىقتىڭ يگىلىگى ءۇشىن كەڭەيتە بەرۋگە نيەتتى ەكەندىگىن ايتتى.
قازاقستان پرەزيدەنتىنە سەنىم گراموتاسىن تاپسىرعاننان كەيىن باق وكىلدەرىنە بريفينگ وتكىزگەن رەسەي ەلشىسى استاناعا اتتانار الدىندا رف پرەزيدەنتى ۆلاديمير پۋتيننىڭ قابىلداۋىندا بولعانىن جەتكىزدى.
«قابىلداۋ بارىسىندا ول قازاقستاندا ەلشى بولىپ جۇمىس ىستەۋ زور سەنىم مەن جاۋاپكەرشىلىك ەكەندىگىن اتاپ ءوتتى. بۇل شىندىعىندا دا سولاي. ويتكەنى، وداقتاستىق قارىم- قاتىناستى دامىتۋ، ەكونوميكالىق بايلانىستار سالاسىنداعى قازاقستانمەن ءبىزدىڭ ىنتىماقتاستىعىمىزدىڭ كۇنتارتىبى ولشەۋسىز»، - دەدى الەكسەي بوروداۆكين.
ايتا كەتەيىك، بۇگىن اقوردادا قازاقستان پرەزيدەنتى نۇرسۇلتان نازاربايەۆ ءبىرقاتار شەت مەملەكەتتەردىڭ توتەنشە جانە وكىلەتتى ەلشىلەرىنەن سەنىم گراموتالارىن قابىلدادى. ولاردىڭ قاتارىندا رەسەي فەدەراتسياسىنىڭ قازاقستانداعى توتەنشە جانە وكىلەتتى ەلشىسى الەكسەي بوروداۆكين دە بولدى.
سالتاناتتى شارا بارىسىندا ەلشىلەرگە ءسوز ارناعان نۇرسۇلتان نازاربايەۆ اعىمداعى جىلى ەلىمىزدە وتەتىن ماڭىزدى وقيعالار تۋرالى ايتتى.
