ەلباسى قازاقستاننىڭ باستى باسىمدىلىقتارىن اتادى
«قازاقستان ە ا ە و، ش ى ۇ، ت م د جانە ۇ ق ش ۇ ارنالارىنداعى ءىس-قيمىلعا ەرەكشە ءمان بەرەتىندىگىن بىلەسىزدەر. ەلىمىزدىڭ سىرتقى ساياساتىنداعى وڭىرلىك ىنتىماقتاستىقتى نىعايتۋ ماسەلەلەرىنىڭ ءمانى زور. 2017-جىلدىڭ قورىتىندىسى بويىنشا، قازاقستان جاقسى ەكونوميكالىق كورسەتكىشتەرگە قول جەتكىزدى. ەكونوميكالىق جانە ينۆەستيتسيالىق ىقپالداستىقتى نىعايتۋ، شەتەلدىك ارىپتەستەرمەن ىنتىماقتاستىق نەگىزگى باعىتتارىمىزدىڭ ءبىرى. ءبىز ساۋدا-ساتتىق كولەمىن ۇلعايتىپ، ءوندىرىستى وركەندەتۋ ءۇشىن ءتيىمدى ينۆەستيتسيا اكەلۋگە مۇددەلىمىز. 2017-جىلى قازاقستان بيزنەس جۇرگىزۋ جەڭىلدىگى رەيتينگى بويىنشا 190 ەلدىڭ اراسىندا 36- ورىنعا يە بولدى»، - دەدى بۇگىن اقوردادا ءبىرقاتار شەتەلدىڭ توتەنشە جانە وكىلەتتى ەلشىلەرىنەن سەنىم گراموتالارىن قابىلداعان نۇرسۇلتان نازاربايەۆ.
مەملەكەت باسشىسى «ەكسپو-2017» كورمەسى بارىسىندا جاسىل تەحنولوگيالاردى دامىتۋ جونىندەگى حالىقارالىق ورتالىق پەن ІТ ستارتاپتاردىڭ حالىقارالىق تەحنوپاركى قۇرىلعانىن دا اتاپ ءوتتى.
«استانا حالىقارالىق قارجى ورتالىعىنىڭ قىزمەتىن جانداندىرۋ قازاقستاننىڭ باستى باسىمدىقتارىنىڭ ءبىرى. وسىعان وراي سىزدەردە حالىقارالىق قارجى ورتالىعىن دامىتۋعا ات سالىسىپ، ونىڭ يگىلىگىن كورۋگە شاقىرامىز. ءوزارا ءتيىمدى ساۋدا-ەكونوميكالىق ىنتىماقتاستىقتى نىعايتۋ ءۇشىن قازاقستانداعى زور مۇمكىندىكتەردى كەڭىنەن پايدالانۋ قاجەت»، - دەدى ەلباسى.
ەلباسى اعىمداعى جىلى ەلىمىزدە ءبىرقاتار ماڭىزدى حالىقارالىق ءىس-شارالار جوسپارلانىپ وتىرعاندىعىنا توقتالدى.
«اتاپ ايتقاندا، استانا ەكونوميكالىق فورۋمى، الەمدىك جانە ءداستۇرلى دىندەر كوشباسشىلارىنىڭ 6-سەزى، دۇنيەجۇزىلىك يسلام ەكونوميكالىق فورۋمى وتەدى. وسى باس قوسۋلارعا سىزدەردىڭ ەلدەرىڭىز بەلسەنە قاتىسادى دەپ ويلايمىن»، - دەدى مەملەكەت باسشىسى.
نۇرسۇلتان نازاربايەۆ ءسوز سوڭىندا ەلشىلەردى قازاقستانداعى ديپلوماتيالىق قىزمەتتەرىنىڭ باستالۋىمەن قۇتتىقتادى.
«قازاقستانداعى ديپلوماتيالىق قىزمەتتەرىڭىزدىڭ باستالۋىمەن تاعى دا سىزدەردى قۇتتىقتايمىن. ەلىمىزدەگى اتقارعان جاۋاپتى قىزمەتتەرىڭىز تابىستى، ءاربىر كۇندەرىڭىز ءساتتى بولسىن. بارشالارىڭىزعا زور دەنساۋلىق، باق-بەرەكە تىلەيمىن»، - دەدى قازاقستان پرەزيدەنتى.
