11:37, 11 - ءساۋىر 2018 | GMT +5
رەسمي مالىمدەمە: لاس-ۆەگاستا گولوۆكيننىڭ جەكپە-جەگى وتپەيدى
استانا. قازاقپارات - Boxingtalk.com دەرەگىنە سايكەس، نيەۆادا شتاتىنداعى اتلەتيكالىق كوميسسيا (NSAC) لاس-ۆەگاستاعى MGM Grand ارەنادا 5- مامىرعا جوسپارلانعان گەننادي گولوۆكيننىڭ جەكپە-جەگى وتپەيتىنىن مالىمدەدى، دەپ حابارلايدى Sports.kz.
ەندى بوكسشى 5- مامىر كۇنى رينگكە شىعىپ جاتسا، جەكپە-جەك لوس-اندجەلەس قالاسىنىڭ سىرتىندا ورنالاسقان كارسونە قالاشىعىندا، StubHub Center شارشى الاڭىندا وتپەك.
ايتا كەتسەك، بۇعان دەيىن BoxRec.com سايتى دا GGG كەلەسى جەكپە-جەگى وتەتىن ورىن رەتىندە كارسوندى بەلگىلەگەن ەدى.
ازىرگە گولوۆكيننىڭ ناقتى قارسىلاسى دا انىقتالعان جوق. بولۋى مۇمكىن كانديداتتار اراسىندا يرلانديالىق گەري و ساليۆان مەن ۋكراينالىق سەرگەي دەريەۆيانچەنكو بار. ا ق ش بوكسشىسى ۆانەس مارتيروسياننىڭ كانديداتۋراسى بۇل تىزىمنەن الىنىپ تاستالدى.
