پاۆلوداردا «قارا جورعا» بيلەپ تانىمال بولعان جىلقى ونەر كورسەتەدى
بۇل تۋرالى وڭىرلىك كوممۋنيكاتسيالار قىزمەتىندە وتكەن بريفينگ بارىسىندا وبلىستىق مادەنيەت، ارحيۆتەر جانە قۇجاتتاما باسقارماسىنىڭ باسشىسى ارداق رايىمبەكوۆ ايتتى.
«30-ساۋىردە ورتالىق الاڭدا ۇلىستىڭ ۇلى كۇنى مەرەكەسىنىڭ سوڭعى كۇنى اۋقىمدى تۇردە اتالىپ وتەدى. بيىل دا ناۋرىز 40 كۇن تويلاناتىنىن بىلەسىزدەر. كوپتەگەن شارا وتەدى. كوكشەتاۋدا قارا جورعا ءبيىن بيلەگەن جىلقىنى پاۆلوداردا تاماشالاي الاسىزدار. شاباندوز جۇرت الدىندا تەگىن ونەر كورسەتەدى»، - دەپ اتاپ ءوتتى ارداق رايىمبەكوۆ.
ەسكە سالايىق، 30-ساۋىردە ناۋرىز مەرەكەسىنىڭ قورىتىندىسى شىعارىلىپ، ورتالىق الاڭدا 70 كيىز ءۇي ورناتىلادى. كيىز ۇيلەر سەگىز اۋىلعا بولىنەدى. جەتەۋىندە وبلىس تۇرعىندارى مەن قوناقتارىنا تاعامداردان ءدام تاراتىلادى. شاعىن ساحنالارادا تەاترلاندىرىلعان قويىلىمدار مەن كونسەرتتەر، ۇلتتىق ويىندار ۇيىمداستىرىلادى.
ورتالىق الاڭدا جاس سۋرەتشىلەر مەن شەبەرلەردىڭ ۇيىمداستىرۋىمەن ۇلتتىق داستۇردەن سىر شەرتەتىن دەكوراتيۆتى «تايقازان»، «ساۋكەلە»، «بورىك» سياقتى ينستاللياتسيالار ورناتىلادى. ەڭ ادەمى ۇلتتىق كيىم كيگەن پاۆلودارلىقتارعا سىيلىقتار ۇسىنىلادى.
