قوشانوۆ قالا اكىمىنە ەرتە تۇرىپ، قالانى ارالاۋدى تاپسىردى

استانا. قازاقپارات - قاراعاندى وبلىسىنىڭ اكىمى ەرلان قوشانوۆ وبلىس ورتالىعى باسشىسىنا قوقىستار مەن لاس كوشەلەر ءۇشىن سىن ايتتى. بۇل تۋرالى قازاقپارات اكىمنىڭ رەسمي سايتىنا سىلتەمە جاساپ حابارلايدى.

«قالانى قوقىستان جاقسىراق تازارتۋ قاجەت. كەشە تاڭەرتەڭ مەن قاراعاندىنى ارالاپ شىقتىم. تۇسىنىكتى، ارينە، قار ەندى عانا ەرىدى، ءبىراق ءبىز قوقىسقا كومىلىپ جاتىرمىز. ءبىر اپتادان سوڭ مەن ۇنەمى قالانى ارالاۋعا شىعاتىن بولامىن. نۇرلان ەرىكباي ۇلى (قاراعاندى قالاسىنىڭ اكىمى- اۆت.)، ءسىز قالانىڭ باسشىسى رەتىندە ەرتەرەك ويانىڭىز. مەن ەمەس، ءسىز قالانى ۇنەمى ارالاپ وتىرۋىڭىز كەرەك»، - دەدى ەرلان قوشانوۆ قاراعاندىنىڭ اكىمىنە اپپاراتتىق جينالىس بارىسىندا.

وبلىس اكىمى ساتپايەۆ كوشەسىنە نازار اۋداردى، وندا جوندەۋ جۇمىستارىنان سوڭ كوپتەگەن شۇڭقىرلار كورىنىپ، اسفالت جابىندىسى بۇزىلىپ جاتىر.

«مەن تاڭەرتەڭ ساتپايەۆ كوشەسىنىڭ بويىمەن ءجۇرىپ ءوتتىم - ءبىر ساۋ جەر جوق! ال جوندەۋ جۇمىستارى 2016- جىلى عانا جاسالعان. ءسىز ول كوشەنى كوردىڭىز بە؟ پروبلەما نەدە؟ ەكى جىل دا ءوتىپ ۇلگەرگەن جوق قوي»، - دەپ نارازىلىعىن ءبىلدىردى ەرلان قوشانوۆ.

قاراعاندى قالاسىنىڭ اكىمى نۇرلان اۋباكىروۆ مەردىگەرلەردىڭ سوزىنە سۇيەنىپ، ولار بارلىق پروبلەما سۋدان دەيدى.

مۇنداي جاۋاپ وبلىس اكىمىنىڭ كوڭىلىن تولتىرمادى. ول زاڭدىق تۇرعىدا باس مەردىگەردەن جولدىڭ ساپاسىنا جاۋاپ بەرۋىن تالاپ ەتۋ كەرەكتىگىن ايتتى.