ماقتاارال اۋدانىندا جاڭا اكىم تاعايىندالدى

شىمكەنت. قازاقپارات - وڭتۇستىك قازاقستان وبلىسىنىڭ ماقتاارال اۋدانىندا جاڭادان اكىم تاعايىندالدى. ق ر پرەزيدەنتى اكىمشىلىگىنىڭ كەلىسىمى جانە ماقتاارال اۋداندىق ءماسليحاتىنىڭ كەلىسىمى بويىنشا وبلىس اكىمى جانسەيىت تۇيمەبايەۆ بۇل قىزمەتكە جامانتاي بەيسەنبايەۆتى تاعايىندادى، دەپ حابارلايدى قازاقپارات ءتىلشىسى.

 اكىمدى اۋدان اكتيۆىنە ارنايى تانىستىرعان ايماق باسشىسى الداعى جۇمىسىنا ساتتىلىك تىلەي وتىرىپ، ەلباسى بەكىتكەن مەملەكەتتىك باعدارلامالاردىڭ ساپالى تۇردە جۇزەگە اسىرۋعا اتسالىسۋ قاجەتتىلىگىن ايتتى.

«مەملەكەت باسشىسى بيىلعى جولداۋىندا اۋىل شارۋاشىلىعىنا ايرىقشا كوڭىل ءبولدى. اسىرەسە بۇل سالانى سيفرلاندىرىپ، ءونىم كولەمىن ارتتىرۋ مىندەتى قويىلىپ وتىر. بۇل جۇمىستى ۇيلەستىرۋدە جامانتاي بەيسەنبايەۆتىڭ تاجىريبەسى مەن بىلىكتىلىگى جەتەدى دەپ ويلايمىن. بۇگىندە مۇندا كوكتەمگى ەگىس ناۋقانى قىزىپ جاتىر، ماقتا تۇقىمى تولىق جەتكىلىكتى. وسى كوكتەمگى ۋاقىتتى ءتيىمدى پايدالانىپ، ەگىن ەگۋدى ۇتىمدى جۇرگىزۋدى، ەكونوميكانى ءارتاراپتاندىرۋدى جانە ءوندىرىس سالاسىنا ينۆەستيتسيا تارتىپ، كوكونىس پەن باقشا داقىلدارىنىڭ ەكسپورتىن ۇلعايتۋدى تاپسىرامىن»، - دەدى جانسەيىت قانسەيىت ۇلى.

سونداي- اق، وبلىس اكىمى اۋداندا گازداندىرۋ جۇمىستارى قارقىندى تۇردە جۇرگىزىلىپ جاتقانىن ايتىپ، سول باعىتتاعى جۇمىستاردى جالعاستىرۋدى جانە ەڭبەك رەسۋرستارىن رەتتەۋدى، حالىقتى جۇمىسپەن قامتۋدى تاپسىردى. وسى رەتتە، اكىم ەڭبەك كۇشى مول ماقتاارال اۋدانىنان، ەڭبەك كۇشى جەتىسپەيتىن رەسپۋبليكامىزدىڭ سولتۇستىك وڭىرلەرىنە قونىستانۋ بويىنشا ءتۇسىندىرۋ جۇمىستارىن كۇشەيتىپ، ەلدى سول جاقتا شارۋاشىلىقپەن اينالىسۋعا شاقىرۋدى مىندەتتەدى.

ايتا كەتەيىك، جامانتاي بەيسەنبايەۆ 1958 -جىلى تۋعان، ءبىلىمى جوعارى، ماماندىعى بويىنشا عالىم اگرونوم، زاڭگەر. ەڭبەك جولىن 1982 -جىلى الماتى وبلىسى قاسكەلەڭ اۋدانى «پريگورودنىي» كەڭشارىنىڭ اعا اگرونومىنان باستاعان. 1984-2011 -جىلدارى اۋىل شارۋاشىلىعى قىزمەتكەرلەرى كاسىپوداعىنىڭ جەتىساي اۋداندىق كوميتەتىنىڭ حاتشىسى، جەتىساي اۋداندىق پارتيا كوميتەتىنىڭ نۇسقاۋشىسى، «كراسنايا زۆەزدا» كەڭشارىنىڭ پارتيا كوميتەتىنىڭ حاتشىسى، حالىق دەپۋتاتتارى جەتىساي اۋداندىق كەڭەسى اۋىل شارۋاشىلىعى ءبولىمىنىڭ مەڭگەرۋشىسى، جەتىساي اۋدانى اكىمىنىڭ ءبىرىنشى ورىنباسارى، ماقتارال اۋدانى اۋىل شارۋاشىلىعى باسقارماسى باستىعىنىڭ ورىنباسارى، ماقتارال اۋدانى جەتىساي قالاسىنىڭ اكىمى، ماقتارال اۋدانى اكىمىنىڭ ورىنباسارى قىزمەتتەرىن اتقارعان.

 2011 -جىلدىڭ شىلدە ايىنان باستاپ ماقتاراال اۋدانىنىڭ ورتالىعى جەتىساي قالاسىنىڭ اكىمى، 2015 -جىلى ماقتاارال اۋدانىنىڭ اكىمى لاۋازىمىن اتقارعان. ال 2016 -جىلدىڭ تامىز ايىنان بۇگىنگى كۇنگە دەيىن وڭتۇستىك قازاقستان وبلىسى اكىمىنىڭ كەڭەسشىسى بولىپ ەڭبەك ەتىپ كەلگەن ەدى.

اۆتور: اينۇر اقبايەۆا