وسكەمەندە قازاق كوشەلەرىنىڭ ازدىعىن جازعان جۋرناليستى قۋدالاعان باسشى قىزمەتىنەن كەتتى

استانا. قازاقپارات - وسىعان دەيىن «قازاق ءۇنى» ۇلتتىق پورتالى وسكەمەندەگى «ديدار» گازەتىنىڭ ءتىلشىسى مۇراتحان كەنجەحان ۇلىنىڭ جاعدايى تۋرالى جازعان بولاتىن.

 وسكەمەندە قازاق كوشەلەرىنىڭ ازدىعىن جازعان جۋرناليست باسشىسى تاراپىنان قۋدالاۋعا تۇسكەنىن الەۋمەتتىك جەلىدەگى پاراقشاسىندا اشىق مالىمدەگەن ەدى.

اتالمىش ىسكە «قازاق ءۇنى» ۇلتتىق پورتالى تىكەلەي ارالاستى. پورتالدا جارىق كورگەن «وسكەمەندەگى 706 كوشەنىڭ 12 پايىزى عانا قازاقشا» اتتى ماقالا قوعامدا ۇلكەن رەزونانس تۋدىردى. ەرتەسىندە ش ق و اكىمىنىڭ يدەولوگيا بويىنشا ورىنباسارى اسەم بەك قىزى گازەت رەداكسياسىندا شۇعىل جينالىس اشىپ، جاعدايدى باقىلاۋىنا الدى.

الايدا، ەلباسىنىڭ «رۋحاني جاڭعىرۋ» باعدارلاماسى اياسىندا جازىلعان ماقالاعا قارسى شىققان باسشىنىڭ جاۋاپكەرشىلىككە تارتىلىپ، قىزمەتىنەن كەتۋىن رەداكسيامىز تالاپ ەتىپ، ش ق و اكىمى دانيال احمەتوۆكە اشىق حات جازدى.

ءوز كەزەگىندە، دانيال احمەتوۆ عاريفوللا ەسىم باستاعان زيالى قاۋىم وكىلدەرىمەن كەزدەسۋ بارىسىندا بۇل جاعدايدىڭ رەتتەلەتىنىن ايتىپ، ۋادە بەرگەن ەدى. زيالى قاۋىم وكىلدەرى «قازاق ءۇنى» باستاعان ۇندەۋدى قولداپ، «شىعىس اقپارات» باسشىسى يرينا ياكۋنينا مەن ش ق و ىشكى ساياسات باسقارماسىنىڭ باسشىسى يرينا كراسنوبايەۆانىڭ قىزمەتتەرىنەن كەتۋىن تالاپ ەتكەن ەدى.

بۇگىن وسكەمەن قالاسىنىڭ ءبىر توپ اقساقالدارى مەن وڭىردەگى رۋحاني كەلىسىم كەڭەسى مۇشەلەرى «قازاق ءۇنى» باس رەداكتورى ازامات تاسقارا ۇلىنا حابارلاسىپ، «شىعىس اقپارات» حولدينگىنە جاڭا باسشى تاعايىندالعانىن ايتىپ، رەداكسيا ۇجىمىنا زور العىسىن جەتكىزدى. بۇل قىزمەتكە ش ق و ىشكى ساياسات باسقارماسى باسشىسىنىڭ ورىنباسارى بولىپ جۇمىس ىستەگەن سەرىك جەڭىسوۆ تاعايىندالدى.

مەملەكەتتىك ءتىل مەن ۇلتتىق مۇددەنى قورعاۋ جولىندا «قازاق ءۇنى» ءاردايىم تالماي ەڭبەك ەتە بەرەدى. ءبىز بارلىق وقىرمان قاۋىمعا وسى جاعدايعا الاڭداۋشىلىق تانىتىپ، قولداعاندارى ءۇشىن العىس ايتامىز.

www.qazaquni.kz