رەسەيگە قارسى سانكسيالاردىڭ ىقپال دەڭگەيىن انىقتايتىن ءىس- قيمىل جوسپارى ازىرلەنەدى

استانا. قازاقپارات - رەسەيگە قارسى امەريكالىق سانكسيالاردىڭ ىقپال دەڭگەيىن انىقتاۋ ءۇشىن ق ر ۇكىمەتى مەن ۇلتتىق بانكتىڭ ءىس- قيمىل جوسپارى ازىرلەنەدى.

 بۇل تۋرالى ق ر ۇلتتىق ەكونوميكا ءمينيسترى تيمۋر سۇلەيمەنوۆ ايتتى، دەپ حابارلايدى قازاقپارات.

ماجىلىستە «2018-2020 -جىلدارعا ارنالعان رەسپۋبليكالىق بيۋدجەتتى ناقتىلاۋ تۋرالى» ق ر زاڭىنىڭ جوباسىن تالقىلاۋ بارىسىندا دەپۋتات البەرت راۋ مينيستردەن ا ق ش- تىڭ رەسەيگە قاتىستى سانكسيالارىنىڭ ەلىمىزدىڭ ەكونوميكاسىنا اسەرىن سۇراعان بولاتىن.

«ءبىز قازاقستان ەكونوميكاسىنا ىقپال ەتەتىن ءتۇرلى ساۋدا، ينۆەستيتسيالىق، باعامدىق ارنالاردى قاراستىردىق. قازىرگى ۋاقىتتا ەڭ ۇلكەن ارنا - بۇل باعام بولىپ وتىر. ياعني، تەڭگە مەن رۋبل باعامىنىڭ بەلگىلى ءبىر بايلانىسى بار. بۇگىن ۇلتتىق بانكپەن بۇل ماسەلەنى جان- جاقتى تالقىلادىق»، - دەپ اتاپ ءوتتى مينيستر.

ونىڭ ايتۋىنشا، رەسەيگە قاتىستى امەريكالىق سانكسيالاردىڭ قازاقستان ەكونوميكاسىنا تىكەلەي ىقپال ەتەتىندەي قانداي دا ءبىر فاكتورلار جوق.

«سوعان بايلانىستى احۋالدىڭ ودان ارى قاراي داميتىندىعىن كەلەسى ساۋدا سەسسياسىنىڭ ىشىندە باقىلاپ كورۋ ۇسىنىلادى. دەگەنمەن، قالاي بولعاندا دا ءبىز اپتانىڭ سوڭىنا دەيىن سانكسيالاردىڭ ىقپال دەڭگەيىن انىقتاۋ جونىندەگى ۇكىمەت پەن ۇلتتىق بانكتىڭ بىرلەسكەن ءىس- قيمىل جوسپارىن جانە ولار بىزگە تەرىس اسەر ەتە باستاعان جاعدايدا ونى شەشۋ جولدارىن جاسايتىن بولامىز»، - دەدى تيمۋر سۇلەيمەنوۆ.

اۆتور: مارلان جيەمباي