قازاق فيلم جاڭا تەلەحيكاياعا بالالار اراسىندا كاستينگ جاريالادى

استانا. قازاقپارات - ش. ايمانوۆ اتىنداعى «قازاق فيلم» كينوستۋدياسى «ماحاببات. ءۇمىت. استانا» اتتى تەلەحيكاياعا بايلانىستى بالالار اراسىندا كاستينگ جاريالادى، دەپ حابارلايدى قازاقپارات ءتىلشىسى كينوستۋديانىڭ باسپا ءسوز قىزمەتىنە سىلتەمە جاساپ.

سەريالدى ق ر مادەنيەت جانە سپورت مينيسترلىگى تاپسىرىسى بويىنشا ش. ايمانوۆ اتىنداعى «قازاق فيلم» ا ق رەسەيلىك «ستۋديا كينو» كومپانياسىمەن بىرلەسە وتىرىپ تۇسىرەدى.

كاستينگكە استانا، الماتى جانە قاراعاندى قالالارىندا تۇراتىن بالالار قاتىسا الادى.

«تەلەحيكاياعا 14-15 جاس ارالىعىنداعى قازاق، ەپتى، وجەت، تۇسىرىلىمدەردە تاجىريبەسى بار ۇل بالا مەن 11-13 جاس ارالىعىنداعى قازاق، ادەمى، ەپتى، كوڭىلدى، تۇسىرىلىمدەردە تاجىريبەسى بار بالا كەرەك. بالا تۋرالى اقپاراتتى (اتى- ءجونىن، تۋعان جىلىن، بويىن، باسقا دا تۇسىرىلىمدەرگە قاتىسقانى تۋرالى) جانە فوتوسۋرەتتى [email protected] ەلەكتروندى پوشتاسىنا جىبەرۋگە بولادى»، - دەلىنگەن حابارلامادا.

 سونىمەن قاتار، فوتوسۋرەتتەردى جانە بالا تۋرالى اقپاراتتى87019913949 نومىرىنە WhatsApp ارقىلى جىبەرۋگە بولادى. كينوستۋديا وكىلدەرى بۇل نومىرگە قوڭىراۋ شالماۋدى سۇرايدى.

ايتا كەتسەك، بىلتىر 19 - جەلتوقساندا ماسكەۋدە ق ر مادەنيەت جانە سپورت ءمينيسترى ارىستانبەك مۇحامەدي ۇلى مەن «پەرۆىي كانال» ا ق باس ديرەكتورى كونستانتين ەرنستتىڭ كەزدەسۋى بارىسىندا ەكى ەل كينو يندۋسترياسى مەن تەلەۆيزيا سالاسىن دامىتۋ بويىنشا ىنتىماقتاستىق جونىندەگى كەلىسىم جاسالعان بولاتىن. كەلىسىم اياسىندا بىرلەسىپ كينو ءتۇسىرۋ تۋرالى ۋاعدالاستىق بولعان.

 ەلوردانىڭ مەرەيتويىنا ارنالىپ تۇسىرىلەتىن ءتورت سەريالى كوركەم تۋىندى رەسەيدىڭ «پەرۆىي كانال» تەلەارناسىنان كورسەتىلەدى. سەريالدىڭ رەجيسسەرلەرى - يۆان گلۋبوكوۆ (رەسەي) جانە ولجاس ەرمەكبايەۆ (قازاقستان). اتالعان فيلم ميستيكا جانە فانتاستيكا ەلەمەنتتەرى بار مەلودراما جانرىندا تۇسىرىلەدى.

اۆتور: ايان بەكەن ۇلى