الەم قازاقتارىنان ارنالعان «مەن قازاقپىن» مەگاجوباسىنىڭ ەكىنشى كەزەڭى باستالادى

 استانا. قازاقپارات - «قازاقستان» ر ت ر ك» ا ق باسقارما ءتوراعاسى ەرلان قارين «مەن قازاقپىن» اتتى حالىقارالىق جوبانىڭ ەكىنشى ماۋسىمىن باستايتىنىن جاريالادى، دەپ حابارلايدى قازاقپارات ءتىلشىسى.

 «مەن قازاقپىن» حالىقارالىق مەگاجوباسى بيىل دا جالعاساتىن بولادى. الدىمەن ءساۋىر- مامىر ايلارىندا اۋدانداردا ىرىكتەۋلەر وتەدى. ودان كەيىن وبلىستىق ىرىكتەۋلەر ۇيىمداستىرىلادى. بايقاۋدىڭ بيىلعى اۋقىمى دا كەڭ. وتكەن جىلى قىتاي، موڭعوليا مەن رەسەيدە ءوتتى. بيىل دا سولاي بولادى. اعىمداعى جىلى قىرعىزستاندا وتكىزۋدى جوسپارلاپ وتىرمىز. سول جاقتاعى باۋىرلارىمىزدى دا تارتامىز. سوسىن وتكەن جىلى رەسەيدىڭ قوساعاش جەرىندە ۇيىمداستىرىلسا، بيىل استراحاندا وتكىزەيىك دەپ وتىرمىز. وسىلايشا، جىلدان جىلعا قالىڭ قازاق مەكەندەگەن سىرتتاعى مەكەندەردى تارتىپ، سول جاقتاعى قانداستارىمىزدى ۇلكەن ساحناعا شىعاراتىن بولامىز» ، - دەدى ە. قارين استانادا وتكەن باسپا ءسوز ءماسليحاتىندا.

ونىڭ ايتۋىنشا، بيىل بايقاۋدىڭ بەلگىسى دا وزگەرگەن. جوبانىڭ شەتەلدە وتەتىنىن ەسكەرىپ، بەلگىنى لاتىن ارپىمەن جازۋ ۇيعارىلعان. «وتكەن جىلى قىتايعا، موڭعولياعا بارعاندا ارىپتەستەرىمىز كيريلليتسامەن ارىپتەردى وقي الماي، ءبىراز قينالعان بولاتىن. لاتىن قارپىنە كوشكەنىمىزگە ءبىز دە قۋانىپ وتىرمىز. سونىڭ ارقاسىندا جوبامىز كەڭىنەن تانىلادى» ، - دەپ اتاپ كورسەتتى ە. قارين.

«مەن قازاقپىن» مەگاجوباسىنىڭ گالا- كونتسەرتىن ءداستۇر بويىنشا تاۋەلسىزدىك كۇنى - 16 - جەلتوقساندا ۇيىمداستىرۋ جوسپارلانعان. سول كەزدە بايقاۋدىڭ جەڭىمپازدارى دا انىقتالادى.

 

اۆتور: ارمان اسقاروۆ