ءشامشىنىڭ شىعارماشىلىق كەشىندە جاڭا ءانى ورىندالدى
ءشامشىنىڭ «كوكتەم ءانى» شىعارماسى العاش رەت الماتىدا وتكەن سازگەردىڭ شىعارماشىلىعىنا ارنالعان كونسەرتتە ورىندالدى.
كەشتىڭ تاعى ءبىر ەرەكشەلىگى ءشامشى ەڭبەكتەرىن وپەرا انشىلەرى جاندى داۋىستا شىرقادى. بۇل ءاننىڭ قولجازباسىن ءشامشى قالداياقوۆ كوزى تىرىسىندە ك س ر و- نىڭ حالىق ءارتىسى روزا جامانوۆاعا بەرگەن ەكەن. جىلدار ءوتىپ، مۇراعاتىندا جاتىپ قالعان ءاندى روزا اپامىز ومىردەن وتەرىندە شاكىرتى، وپەرا ءانشىسى بالاپان جۇبايەۆاعا اماناتتايدى. قولىنا تۇسكەن تۋىندىنى زەرتتەپ، زەردەلەگەن ءانشى بۇل ءاننىڭ ەش جەردە ورىندالماعانىنا جانە اندە ءشامشى قالداياقوۆتىڭ وزىندىك مانەرى، قولتاڭباسى بار ەكەنىنە كوز جەتكىزەدى. قايتا جاڭعىرعان ءان سازگەردىڭ شىعارماشىلىعىنا ارنالعان كەشتە العاش رەت ورىندالدى.
«اكەمنىڭ اندەرى ءار قازاقتىڭ قۇلاعىندا. ءاننىڭ ءبىر ءسوزىن ەستىسە بولدى، ءىلىپ الىپ، بىرگە شىرقايدى. ءشامشى شىعارماشىلىعىنىڭ ەرەكشەلىگى وسى. ونىڭ اندەرى حالىقتىڭ سۇيىكتىسىنە اينالدى. بۇگىن ورىندالعان جاڭا ءان دە تىڭدارماننىڭ جۇرەگىنەن ورىن الارى ءسوزسىز»، - دەيدى ش. قالداياقوۆتىڭ ۇلى، اباي اتىنداعى مەملەكەتتىك اكادەميالىق وپەرا جانە بالەت تەاترى ديريجەرى مۇحتار قالداياقوۆ.
بىرنەشە ۇرپاقتى ليريكالىق تۋىندىلارىمەن سۋسىنداتىپ كەلە جاتقان ءشامشى اندەرىن ءوز رەپەرتۋارىنا قوسپاعان ءانشى كەمدە-كەم. بۇل كەشتە اباي اتىنداعى وپەرا جانە بالەت تەاترىنىڭ انشىلەرى تىڭدارماننىڭ جۇرەگىندە جاتتالىپ قالعان اندەردى وزگەشە وڭمەن، وركەستردىڭ سۇيەمەلدەۋىمەن تابيعي داۋىستا شىرقادى.
«بۇل اندەر - مەنىڭ وزىمە ونەرگە جولداما بەرگەن اندەر. باياعىدا 1993-1994-جىلدارى شىمكەنت قالاسى مەن جامبىل قالاسىندا ەكى رەت وسى ءشامشى اعامىزدىڭ اندەرىنىڭ كونكۋرسى ءوتتى. سول كەزدە وسى اندەردى ايتىپ، لاۋرەات بولعانمىن». اباي اتىنداعى م ا و ب ت جەتەكشى ءسوليسى گۇلزات داۋىربايەۆا.
