ماجىلىستە اسكەري- عىلىمي زەرتتەۋ ماسەلەلەرى تالقىلاندى

استانا. قازاقپارات - قازاقستاندا اسكەري- عىلىمي الەۋەت تولىق پايدالانىلماي كەلەدى. بۇل تۋرالى پارلامەنت ماجىلىسىندە اسكەري ءبىلىم بەرۋدى دامىتۋ تاقىرىبىنداعى ۇكىمەت ساعاتىندا پالاتانىڭ حالىقارالىق ىستەر، قورعانىس جانە قاۋىپسىزدىك كوميتەتىنىڭ ءتوراعاسى مۇحتار ەرمان ءمالىم ەتتى، دەپ حابارلايدى قازاقپارات.

 «اسكەري ءبىلىم - قازاقستاندىق ءبىلىم بەرۋ جۇيەسىنىڭ اجىراماس، قۇرامداس بولىگى دەپ قاراۋىمىز كەرەك. وسىعان بايلانىستى، اسكەري جانە ازاماتتىق جوعارى وقۋ ورىندارى ءوزارا تىعىز قارىم- قاتىناستا بولىپ، ۇزدىك پەداگوگيكالىق تاجىريبەلەرىمەن الماسۋى ءتيىس. سوندا عانا اسكەري ءبىلىم بەرۋدىڭ بەرىك نەگىزىن قالاپ، جوعارى دەڭگەيىن قامتاماسىز ەتۋگە بولادى. سونىمەن قاتار، قورعانىس- ونەركاسىپ كەشەنىنە جوعارى بىلىكتى ينجەنەر- تەحنيك ماماندار دايارلاۋ ءالى شەشىمىن تاپپاي كەلە جاتقانىن ايتا كەتۋ كەرەك. قورعانىس- ونەركاسىپ كەشەنى سالاسىنا مامانداردى قاجەت بولسا شەتەلدىڭ الدىڭعى قاتارلى وقۋ ورىندارىندا وقىتىپ، ءتيىستى قورعانىس كاسىپورىندارىندا تاجىريبەدەن وتكىزۋ قاجەت»، - دەپ توقتالدى دەپۋتات.

ونىڭ پايىمىنشا، عىلىمدى دامىتپايىنشا، قازىرگى زامانعا ساي كاسىبي ارميا قۇرۋ مۇمكىن ەمەس. تالداۋ ناتيجەلەرى كورسەتىپ وتىرعانداي، قولداعى بار عىلىمي الەۋەت تولىق پايدالانىلماي كەلەدى.

«يننوۆاتسيالارعا قاتىستى ءبىر ماسەلەگە توقتالىپ وتەيىن. رەسمي دەرەكتەرگە قاراعاندا، 2009 - جىلدان باستاپ كۇنى بۇگىنگە دەيىن اسكەري تاقىرىپ بويىنشا 38 اۆتورلىق كۋالىك پەن پاتەنتتەر تىركەلدى. ولاردىڭ نەگىزگى تاقىرىپتارى: قازىرگى زامانعى اسكەري ءبىلىم بەرۋ جۇيەسى، باسقارۋ جۇيەسى، اعىلشىن ءتىلىن ۇيرەنۋ ءۇشىن موبيلدى جۇيە، جاڭا ينجەنەرلىك- تەحنيكالىق شەشىمدەر. دەگەنمەن، اسكەري عىلىمي زەرتتەۋ ناتيجەلەرىن ازىرلەۋ جانە ەنگىزۋ جۇمىسىن كۇشەيتۋ كەرەك. وسىعان بايلانىستى قورعانىس مينيسترلىگى بولاشاققا ارنالعان عىلىمي باعىتتاردى ايقىنداپ، ولاردى تيىسىنشە قارجىلاندىرۋدى قازاقستان رەسپۋبليكاسىندا عىلىمدى دامىتۋدىڭ باسىم باعىتتارى تىزبەسىنە ەنگىزۋى ءتيىس. ۇلتتىق جانە ينجەنەرلىك اكادەميالارىنىڭ الەۋەتىن قولدانۋ قاجەت. قورعانىس قابىلەتىن دامىتۋ ءۇشىن وزىق يدەيالار مەن تاسىلدەردى، جاڭا تەحنولوگيالاردى ىزدەستىرۋ، دامىتۋ جانە ەنگىزۋ ماقساتىندا اسكەري يننوۆاتسيالىق تەحنوپوليس قۇرۋ تۋرالى شەشىم قابىلداعان ر ف تاجىريبەسىمەن تانىسۋ ارتىق بولماس دەپ ەسەپتەيمىز»، - دەدى مۇحتار ەرمان.

اۆتور: رۋسلان عابباسوۆ