باتىس قازاقستاندا وسىمدىك مايىن وندىرەتىن زاۋىت قايتا ىسكە قوسىلدى

ورال. قازاقپارات - ب ق و- نىڭ تەرەكتى اۋدانىندا جاڭعىرتۋدان كەيىن وسىمدىك مايىن وندىرەتىن «تەرەكتى ماي كومبيناتى» ج ش س زاۋىتى قايتا ىسكە قوسىلدى، دەپ حابارلايدى قازاقپارات ءتىلشىسى.

وسىعان وراي بۇگىن كاسىپورىندا بولعان وبلىس اكىمى التاي كولگىنوۆ اتالمىش زاۋىتقا مەملەكەت تاراپىنان ۇلكەن قولداۋ كورسەتىلگەنىن اتاپ ءوتتى. كوپ قاراجات قۇيىلىپ، جاڭادان تەحنولوگيالار اكەلىندى. سونىڭ ناتيجەسىندە جاڭا جۇمىس ورىندارىن اشىپ، ءوڭىر قاجەتىن وتەۋمەن بىرگە شەتەلگە ءونىم شىعارۋعا مۇمكىندىك تۋىپ وتىر. ەكىنشىدەن، بۇل شارۋا قوجالىقتارىنا دا ءتيىمدى. ولار وسىرگەن مايلى داقىلدارىن وسىندا وتكىزەدى.

پويما اۋىلىنداعى كۇنباعىس مايىن وندىرەتىن زاۋىت باستاپقىدا 2009-جىلى اشىلعانىمەن، بۇرىنعى يەلەرى ونىڭ جۇمىسىن الىپ كەتە المادى. 2014-جىلى جاڭا ينۆەستور تارتىلىپ، تۇرالاپ قالعان كاسىپورىن قارىزىن وتەۋمەن بىرگە ءوندىرىستى تەحنيكالىق جاعىنان جاڭعىرتۋدى قولعا الدى.

ينۆەستور «بەلەس-اگرو» كومپانيالار توبىنىڭ جەتەكشىسى مۇرات جاكىبايەۆتىڭ ايتۋىنشا، جاڭعىرتۋ جۇمىستارىنا بارلىعى 2,3 ميلليارد تەڭگە كەتتى. مۇندا ورناتىلعان ەۋروپالىق قۇرال-جابدىقتار مەن زاماناۋي تەحنولوگيا ءوندىرىس كولەمىن ەكى ەسەدەي ارتتىرۋعا مۇمكىندىك بەرەدى. مىسالى، بۇرىن جىلىنا 20 مىڭ توننا شيكىزات وڭدەلسە، قازىر 45 مىڭ تونناعا جەتەدى. بۇرىن مايلى داقىلداردان 30 پايىز ماي الىنسا، ەندى جاڭا جەلى ارقىلى 43 پايىزعا دەيىن الۋعا بولادى.

 بىلايشا ايتقاندا، بۇرىن تاۋلىگىنە 70 توننا شيكىزات وڭدەلىپ، 20 توننا ماي الىنسا، ءقازىر بۇل كورسەتكىشتەر سايكەسىنشە 144 توننا جانە 50 تونناعا جەتىپ وتىر. جاڭادان بۋ قازاندىعى ورناتىلىپ، شيكىزات دايىندايتىن، ءداندى سىعىمداپ، تازارتاتىن، ەكستراكتسيالايتىن سەحتار ىسكە قوسىلدى. دانىنەن اجىراتىلعان كۇنباعىس قابىعى جاعىلىپ، ودان بۋ وندىرىلەدى. الداعى ۋاقىتتا بۋ قازاندىعىن جىلىجاي شارۋاشىلىعى مەن مال ازىعىن دايىنداۋعا دا پايدالانۋعا بولادى.

كۇنى بۇگىن زاۋىتتا 100 دەن استام ادام تۇراقتى ەڭبەك ەتەدى.

مۇندا وسىمدىك مايىنىڭ «بەلەس» كۇنباعىس مايى دەپ اتالاتىن ەكى ءتۇرى، ياعني تازارتىلعان، يىسسىزدەندىرىلگەن، مۇزداتىلعان، وعان قوسا رافينادتالماعان تۇرلەرى وندىرىلەدى. زاۋىت ونىمدەرى باتىس قازاقستان، اقتوبە، اتىراۋ وبلىستارىندا ساتىلۋدا. جاقىندا «بەلەس» مايىنىڭ 50 تونناسى وزبەكستانعا جونەلتىلدى. ەڭ باستىسى، ءونىم حالىقارالىق تالاپتارعا ساي كەلەدى.

الداعى ۋاقىتتا كاسىپورىن اياسىن ودان ءارى كەڭەيتىپ، مارگارين مەن ماي، قۇراماجەم، اۋىز سۋ ءوندىرۋ كوزدەلۋدە. جىلىجاي كەشەنى دە سالىنباقشى.