استانادا تۇنگى سوتتار قايدا وتەدى؟
استانا سوتىندا وتكەن دوڭگەلەك ۇستەلدە «تۇنگى سوت» پيلوتتىق جوباسى اياسىندا تۇنگى ۋاقىتتا بولعان اكىمشىلىك قۇقىق بۇزۋشىلىقتار تۋرالى ءىستى قاراۋ مۇمكىندىكتەرى تالقىلاندى.
جوعارعى سوتتىڭ سۋدياسى ۇلبوسىن سۇلەيمەنوۆا سينگاپۋردىڭ تاجىريبەسىن ەنگىزۋدىڭ ازاماتتار ءۇشىن ماڭىزدى ەكەنىن ايتتى. وندا تۇنگى (كەشكى) سوتتاردا اپتاسىنا 4 رەت جول-كولىك وقيعالارى بويىنشا شۇعىل ىستەر قارالادى. تۇنگى سوتتا ءىستى قاراۋدىڭ الدىندا تاراپتار (جابىرلەنۋشى، قۇقىق بۇزۋشى) ءوز وكىلدەرىمەن جول-كولىك وقيعاسى (ج ك و) بويىنشا سۇراقتار انكەتاسىن تولتىرادى. بارلىق تالاپتار تۇنگى سوتتا ءبىر رەتتىك تالقىلاۋدىڭ اياسىندا جىلدام شەشىلەدى. شەتەلدىك تاجىريبەگە سەنسەك، وسىدان كەيىن تاراپتاردىڭ داۋدى ارى قاراي جالعاستىرۋعا قۇلقى بولمايدى ەكەن.
استانا ءى ءى د جەرگىلىكتى پوليتسيا قىزمەتىنىڭ باستىعى تاحير ءابدىراحمانوۆ ج ك و بويىنشا اكىمشىلىك ىستەر جونىندەگى ءوز پىكىرىن ءبىلدىردى. استانا ءى ءى د كوشى-قون قىزمەتى باسقارماسى باستىعى ورىنباسارىنىڭ مىندەتىن اتقارۋشى ارمان بايمۇحامبەت كوشى-قون زاڭدىلىعى سالاسىنداعى قۇقىق بۇزۋشىلىقتاردى دا كەشكى ۋاقىتتا قاراۋدى ۇسىندى. استانا قالاسى پروكۋرورىنىڭ اعا كومەكشىسى يگىلىك بازەنوۆ وسى ساناتتاعى ىستەردى تىركەۋ مەن قاراۋ ءتارتىبى بويىنشا ءوز ۇسىنىستارىن ايتتى.
تالقىلاۋ قورىتىندىلارى بويىنشا شارا قاتىسۋشىلارى وسى جوبانى استانا قالاسى مامانداندىرىلعان اۋدانارالىق اكىمشىلىك سوتىندا ىسكە اسىرۋ قاجەتتىگىن اتاپ كورسەتتى.
پيلوتتىق جوبانى ىسكە اسىرۋ ماسەلەلەرى الماتى قالالىق سوتىندا دا تالقىلاندى. وعان قالالىق سوتتىڭ ءتوراعاسى نۇرعازى ءابدىقانوۆ، قۇقىق قورعاۋ ورگاندارى، ادۆوكاتۋرا، پروكۋراتۋرا، كوشى-قون قىزمەتى جانە ساقتاندىرۋ كومپانيالارىنىڭ وكىلدەرى قاتىستى.
ەسكە سالا كەتەيىك، بۇعان دەيىن «تۇنگى سوتتار» قالاي جۇمىس ىستەيتىنى جايلى استانا قالالىق سوتىنىڭ باسپا ءسوز حاتشىسى بوتاگوز بايان ايتىپ بەرگەن بولاتىن.
