اۋىلدا بيزنەس اشۋ: ءبىر ادامعا قانشا اقشا بەرىلەدى
«بۇگىندە جاپپاي كاسىپكەرلىكتى دامىتۋ جانە ناتيجەلى جۇمىسپەن قامتۋ باعدارلاماسى بار. سونىڭ اياسىندا حالىققا بيزنەستى اشۋ ءۇشىن جەڭىلدەتىلگەن شارتتارمەن نەسيە بەرۋ قاراستىرىلعان. اتاپ ايتقاندا، قازىرگى كەزدە 18 ميلليون تەڭگەگە دەيىن نەسيە الۋعا مۇمكىندىك بار. وسى اقشا بەس جىلعا بەرىلەدى. ال اۋىل شارۋاشىلىعىنا بەرىلگەن نەسيەلەردىڭ مەرزىمى - 7 جىل. جىلدىق مولشەرلەمە 6 پروتسەنتتەن اسپاۋى ءتيىس»، - دەدى ەڭبەك نارىعىن دامىتۋ جانە حالىقتى جۇمىسپەن قامتۋ دەپارتامەنتى ديرەكتورىنىڭ ورىنباسارى ەربولات ءابىلحاتين استانادا وتكەن باسپا ءسوز ءماسليحاتىندا.
ونىڭ ايتۋىنشا، باستاپقىدا اۋىلدىق جەرلەردە نەسيەگە كەپىلدىك بەرۋ ماسەلەسى قيىن بولدى. بىلتىر اتالعان ماسەلە شەشىلدى. ەندى، بيزنەستى ءبىرىنشى رەت باستاپ وتىرعاندار ءۇشىن نەسيەنىڭ 80 پروتسەنتىنە مەملەكەتتىڭ ءوزى كەپىلدىك بەرەدى. ال بيزنەستى ارى قاراي جالعاستىراتىن كاسىپكەرلەر 50 پروتسەنتتىك كەپىلدىكتى الا الادى. «ماسەلەن، بىلتىر 7200 ادام شاعىن نەسيە الدى. سونىڭ ىشىندە 6 791- ءسى - اۋىلدىڭ حالقى، قالعانى - قالا تۇرعىندارى. ال بيزنەسىن جاڭادان باستاعانداردىڭ سانى 4127 ادامدى قۇرادى»، - دەپ اتاپ كورسەتتى ە. ەبىلحاتين.
ايتا كەتەيىك، ق ر پرەزيدەنتى نۇرسۇلتان نازاربايەۆتىڭ بەس الەۋمەتتىك باستاماسى شاعىن نەسيەلەندىرۋدى كەڭەيتۋ مىندەتى قويىلعان بولاتىن. اتاپ ايتقاندا، مەملەكەت باسشىسى شاعىن نەسيەلەرگە قوسىمشا 20 ميلليارد تەڭگە ءبولۋدى تاپسىردى.
«وسىلايشا، شاعىن نەسيەلەندىرۋ كولەمى 62 ميللياردقا جەتەتىن بولادى. اسىرەسە، اۋىلدى جەرلەردە. جالپى، اۋىلدا عانا ەمەس، بارلىق جەردە ادامدار ءوز بيزنەسىن اشا الادى. سونىڭ ارقاسىندا شاعىن نەسيەلەندىرۋدىڭ كولەمى 14 مىڭ ادامدى قامتيتىن بولادى. بۇل وتكەن جىلمەن سالىستىرعاندا ەكى ەسەگە ارتىق. 14 مىڭ ادام ول از ەمەس. سەبەبى ءبىر ادامنىڭ قاراماعىندا ءۇش- ءتورت، ون، بالكىم، ەلۋ ادام جۇمىس ىستەيتىن بولادى. بۇنىڭ بارلىعىن قوسقاندا مىقتى شاعىن بيزنەس شىعادى. سوعان قولداۋ جاساۋىمىز قاجەت»، - دەدى ن. نازاربايەۆ پارلامەنت پالاتالارىنىڭ بىرلەسكەن وتىرىسىندا.
فوتو: projectrussia.ru
اۆتور: ارمان اسقاروۆ
