ارال ايماعىنداعى سۋارمالى جەرلەرگە سۋ جەتىسپەي جاتىر
دەسەك تە وبلىس اگراريلەرى باسقا ءداندى داقىل ونىمدەرىن ەگۋ كورسەتكىشىن ارتتىرامىز دەپ وتىر. ەگىن ناۋقانىنا العاشقىلاردىڭ ءبىرى بولىپ وبلىستىڭ وڭتۇستىك اۋداندارى كىرىستى. ماسەلەن، توڭكەرىس اۋىلىندا جازدىق بيداي ەگىلىپ بولدى. ال كۇرىشتى جىلداعىدان 10 كۇنگە كەش باستاماق. «ازىرگە اۋا رايى قولايسىز»، - دەيدى ديقان قاۋىم. وعان دەيىن جوڭىشقا تۇقىمىن سەبەدى. بۇل جەردىڭ قۇنارىن ارتتىرۋ ءۇشىن كەرەك. اۋىسپالى ەگىستىكتىڭ تالابى - وسى. وسىمدىك اۋرۋلارىنا قاتىستى ماسەلەنى دە شەشىپ قويعان.
باۋىرجان كوپەيەۆ، شارۋا قوجالىعىنىڭ ءتوراعاسى - ارناۋلى پرەپاراتتارمەن ۋاقىتىسىندا جاعدايىن جاساپ جاتىرمىز. سونىڭ ارقاسىندا اۋرۋدى قازىر جەڭدىك دەپ ەسەپتەيمىز. بيىلعى مەجەمىز - مىڭ گەكتار جەرگە كۇرىش ورنالاستىرۋ. اۋدانىمىزعا ۇرلەمەلى توسپا سالىنعالى سۋدان پروبلەما جوق قازىر. دەگەنمەن ماماندار بيىل سىر مارجانىن وتكەن جىلعىدان 10 مىڭ گەكتارعا از ەگۋدى كوزدەپ وتىر. باستى سەبەپ - سىردارياعا تۇسەتىن سۋ كولەمىنىڭ ازدىعى. ەسەسىنە ايماق بىرنەشە جىلدان بەرى اۋىلشارۋاشىلىعىن ءارتاراپتاندىرۋعا باسىمدىق بەرىپ كەلەدى.
وسى رەتتە بيىل ماقسارىنىڭ كولەمىن 10 مىڭ گەكتارعا دەيىن جەتكىزبەك. ودان ماي سىعىپ، ەكسپورتقا شىعارۋ جوسپاردا بار. جەرگىلىكتى عالىمدار شىعارعان تۇيەجوڭىشقانىڭ جاڭا ءتۇرى دە ەڭبەك ونىمدىلىگىن ارتتىرۋعا سەپ بولعان.
ءومىرحان پاشكەنوۆ، وبلىستىق اۋىلشارۋاشىلىعى باسقارماسىنىڭ باسشىسى:
- مىسال ءۇشىن ءبىزدىڭ اۋىسپالى ەگىستىكتە نەگىزىنەن 3 جىل كۇرىش، 3 جىل جوڭىشقا ەگۋمەن اينالىساتىن بولساق، كەلەشەكتە وسى جاڭا تەحنولوگيانى قولدانساق، ءبىز 2 جىل كۇرىش، 2 جىل جاڭا داقىل، روتاتسيا اۋىستىرۋ ماسەلەسىن جەدەلدەتەتىن بولامىز. بۇل ەندى ۇلكەن شارۋالارعا ەڭبەك ونىمدىلىگىن ارتتىرادى، ءوزىنىڭ ۇلەسىن بەرەتىن بولادى. بۇدان بولەك اق كۇرىشپەن اتى شىققان سىر ءوڭىرى العاش رەت سويا داقىلىن دا وندىرىستىك نەگىزدە ەگىپ، سىناقتان وتكىزىپ كورمەك. ەگەر وڭ ناتيجە بەرسە، كولەمىن كوبەيتەتىن بولادى.
الداعى ۋاقىتتا ءوڭىر شارۋالارى تيىمدىلىگى مول وسىنداي تىڭ باعىتتاردى دامىتۋعا نيەتتى. جالپى بيىل وبلىس بويىنشا 177 مىڭ گەكتار جەرگە ءتۇرلى ءداندى داقىل ەگىلەدى.
اۆتورلارى: نۇرلان جاقىپبەكوۆ، ءالحايدار تۇرلىحانوۆ
www.24.kz
