كرەمل: ترامپ پۋتيندى اق ۇيگە شاقىرعان

ۋشاكوۆتىڭ 2 - ءساۋىر كۇنى رەسەيلىك اقپارات اگەنتتىكتەرىنە حابارلاۋىنشا، ترامپ پۋتيندى ونىمەن ناۋرىز ايىندا تەلەفونمەن سويلەسكەن كەزىندە شاقىرعان.

ترامپ پەن پۋتيننىڭ جۇزبە- ءجۇز كەزدەسۋ مۇمكىندىگىن تالقىلاعانىن اق ءۇي دە راستادى. اق ءۇيدىڭ باسپا ءسوز حاتشىسى سارا ساندەرس ترامپ 20 - ناۋرىزدا پۋتينمەن تەلەفونمەن سويلەسكەنىندە اق ۇيگە ساپارلاۋ جايىن تالقىلاعانىن ايتتى.

«پرەزيدەنت ترامپ 20 - ناۋرىزدا پۋتينمەن تەلەفونمەن سويلەسكەن سوڭ ونىمەن «تىم جاقىن ۋاقىتتا» بەلگىلى ءبىر جەردە، ونىڭ ىشىندە اق ۇيدە ەكەۋارا كەزدەسۋ جايىن تالقىلاعانىن راستادى» دەدى ساندەرس.

ترامپ پەن پۋتين تەلەفونمەن امەريكالىق تاراپتىڭ باستاماسىمەن سويلەسكەن. ول كەزدە ترامپ پۋتيندى پرەزيدەنت بولىپ سايلانۋىمەن قۇتتىقتاعان. Washington Post اق ءۇي ترامپتى پۋتيندى قۇتتىقتاماۋعا شاقىرعانىن جانە اڭگىمەنى ۇلى بريتانيادا ۋلانعان رەسەي سىرتقى بارلاۋ قىزمەتىنىڭ بۇرىنعى وفيتسەرى سەرگەي سكريپالدىڭ ءىسىن تالقىلاۋدان باستاۋعا كەڭەس بەرگەنىن حابارلاعان. ا ق ش پرەزيدەنتى ول كەزدە Twitter- دە رەسەيمەن قارىم- قاتىناس ورناتۋ «جاقسى» ەكەنىن جازعان.

26 - ناۋرىزدا ۆاشينگتون سەرگەي سكريپال مەن قىزى يۋليا سكريپالدىڭ ۋلانۋىنا جاۋاپ رەتىندە رەسەيلىك 60 ديپلوماتتى ەلدەن شىعارىپ، سيەتلدەگى رەسەي كونسۋلدىعىن جابۋعا شەشىم قابىلداعان. ماسكەۋ بۇعان جاۋاپ رەتىندە امەريكالىق 60 ديپلوماتتى ەلدەن شىعارىپ، سانكت- پەتەربۋرگتەگى كونسۋلدىقتى جاپقان.

www.azattyq.org