شىعىس قازاقستانداعى سۋ تاسقىنى: جاعداي قالىپقا كەلۋدە

ناۋرىز ايىنىڭ باسىنان بەرى شىعىس قازاقستان وبلىسىندا 1371 ءۇيدى سۋ باسقان. ال بۇگىنگى كۇنى زىريان اۋدانىندا 308 ءۇي بۇقتىرما وزەنىندەگى سۋ دەڭگەيى 1,5 مەترگە كوتەرىلۋىنەن سۋ استىندا قالىپ وتىر. ءبىر اي بويى وڭىردەن 3 مىڭعا جۋىق تۇرعىن ءقاۋىپسىز جەرگە كوشىرىلدى.

الدىن الا مالىمەت بويىنشا، ساراپتاما جۇرگىزىلگەن 83 ءۇي قايتا قالپىنا كەلتىرۋگە جارامايدى. اتاپ ايتقاندا وسكەمەندە - 7، اياگوزدە - 35، گلۋبوكوە اۋدانىندا - 21، شەمونايحا اۋدانىندا - 16، قاتونقاراعاي اۋداندارىندا - 4 ءۇي.

جالپى، سۋ تاسقىنىنىڭ سالدارىن جويۋ ءۇشىن وبلىس بيۋدجەتى رەزەرۆىنەن 689,2 ميلليون تەڭگە قاراستىرىلعان. بۇگىنگى كۇنى تۇرعىن ءۇيدى قالپىنا كەلتىرۋ جۇمىستارىنا 195 ميلليون تەڭگە ءبولىندى. (اياگوز اۋدانىنا - 80 ميلليون، شەمونايحاعا - 40 ميلليون، گلۋبوكوە اۋدانىنا 75 ميلليون تەڭگە).

سونداي-اق «پارىز» وبلىستىق قوعامدىق قورى ارقىلى تۇرعىن ءۇيدى ساتىپ الۋعا جانە كومەككە 150 ميلليون تەڭگە بولىنگەن. جانە اۋدانداردا دا زارداپ شەككەندەرگە اقشا جيناۋ ءۇشىن ارنايى ەسەپشوتتار اشىلدى. مىسالى، «شەمونايحا بولاشاق»، «زىريان - ءبىزدىڭ قالا»، «دامۋ»، «اياگوز بولاشاق»، «اسىل» قوعامدىق قورلارى. ماتەريالدىق جانە قارجىلىق كومەك استانا، پاۆلودار، الماتى، باتىس قازاقستان، سولتۇستىك قازاقستان وبلىستارىنان كەلەدى.

سۋ تاسقىنىنىڭ سالدارىن جويۋ كەزىندە شىعىس قازاقستان وبلىسى ت ج د- نىڭ 407 تەحنيكاسى مەن قىزمەتكەرى تارتىلدى. سونداي-اق، كومەككە ۇلتتىق ۇلان، اكىمدىك، كوممۋنالدىق قىزمەتتەردىڭ قىزمەتكەرلەرى تارتىلدى.

ال سۋ تاسقىنىنان كەيىن قوقىستى تازالاۋ جۇمىستارىن 3100 ەرىكتى جۇرگىزدى. ولاردىڭ اراسىندا مەملەكەتتىك قىزمەتشىلەر، ۇيىمدار مەن كاسىپورىنداردىڭ قىزمەتكەرلەرى، ستۋدەنتتەر، پارتيالار مەن قوعامدىق بىرلەستىكتەردىڭ وكىلدەرى بار. ءقازىر ارنايى كوميسسيا كەلتىرىلگەن زالالدى باعالاۋدا. ال باسپاناسىز قالعان 20 تۇرعىن جاڭا ءۇيدىڭ كىلتىن العان. ونىڭ 16 سى اياگوز اۋدانىنىڭ تۇرعىنى بولسا، 4 ەۋى قاتونقاراعايلىق.