ۆيرتۋالدى كەڭىستىكتەگى قىلمىس بوي بەرمەي بارادى

جاڭا قۇرىلىمدا قۇرامىنا ارنايى جاساققا بەرگىسىز 500 تەرگەۋشى مەن ساراپشى كىرەتىن تۇتاس ءبىر كوماندا جۇمىس ىستەيدى. ول توكيو قالاسىنىڭ پوليتسيا باسقارماسىنا قارايدى.

بۇل جايىندا Kyodo اقپارات كوزى حابار تاراتتى.

ۆيرتۋالدى كەڭىستىكتەگى قىلمىستارعا قارسى كۇرەسەتىن ماماندار كۇنشىعىس ەلىنىڭ ءتۇرلى پوليتسيا بولىمشەلەرىندە جانە قاۋىپسىزدىككە جاۋاپتى ارنايى جاساق قۇرامىندا جۇمىس ىستەيتىن. سوڭعى ۋاقىتتا ەلەكتروندى تەحنولوگيادا پايدا بولعان، كۇننەن كۇنگە بوي بەرمەي جاتقان، كەڭىنەن ەتەك العان وسى زامانعى قىلمىس تۇرىمەن كۇرەستى ءتيىمدى ەتۋ ءارى بەلسەندى جۇرگىزۋ ءۇشىن مامانداردى ءبىر ورتالىققا شوعىرلاندىردى.

ماسەلەن، وتكەن جىلدىڭ وزىندە كۇنشىعىس ەلىندە كومپيۋتەردەن 3 ميلليون اقپارات ۇرلانعان، سونىڭ ىشىندە، نەسيە كارتاسىنداعى قۇپيا مالىمەتتەردى ۇرلاۋ قىلمىسى ارتىپ كەتكەن. بۇل قىلمىستا جولى بولعان حاكەرلەر 17,6 ميلليارد يەندى ($166 ميلليون) قالتاسىنا باسقان.

ال بۇل كورسەتكىش ونىڭ الدىنداعى 2016 -جىلى ەكى ەسە از تىركەلگەن ەدى. وتكەن جىلى حاكەرلەر ەلدەگى 82 ۇيىمنىڭ كومپيۋتەرلىك جۇيەسى بۇزىپ كىرۋگە تالپىنعان. جالعىز جاپونيا عانا ەمەس، سونىمەن قاتار، الەمنىڭ كوپتەگەن ەلىندە كيبەر قىلمىس ادەتتەگى جايتقا اينالىپ وتىر.

كەيبىر ەلدەردە حاكەرلەرگە قارسى قىلمىستىق جاۋاپكەرشىلىك قاراستىرىلعان زاڭدى دا قابىلداپ قويعان.

ماسەلەن، رەسەي فەدەراتسياسى، گەرمانيا، ت. ب. كيبەر قىلمىستان كەلەتىن شىعىن ەڭ ءىرى تابيعي اپاتتان بولاتىن شىعىنمەن بىردەي الەم بويىنشا: 53 ميلليارد دوللار نەمەسە ودان دا جوعارى. تۇتاس ءبىر مەملەكەتتى سازعا وتىرعىزىپ، ىرگەسىن شايقايتىن قاۋىپتى سيپات الىپ بارادى.

ساراپشىلاردىڭ ايتۋىنشا، الداعى ۋاقىتتا ۆيرتۋالدى كەڭىستىكتەگى قىلمىس ارتپاسا، كەمىمەيدى. بۇل قىلمىستىڭ تاعى ءبىر ەرەكشەلىگى ەسىرتكى مەن زاڭسىز قارۋ-جاراق ساۋداسى سەكىلدى شەكارانى مويىندامايدى. وزگە ەلدىڭ حاكەرى كەلەسى ەلدىڭ قاۋىپسىزدىگىنە قاتەر توندىرە الاتىن مۇمكىندىككە يە.

islam.kz