قىرعىزستاندا ارحەولوگ پەن مۋزەي قىزمەتكەرى جەتىسپەيدى
استانا. قازاقپارات - قىرعىزستاندا ارحەولوگتار مەن مۇراجاي قىزمەتكەرلەرى جەتىسپەيدى. وسىنىڭ سالدارىنان كونەدەن قالعان مۇرالاردى ىزدەستىرىپ، قازبا جۇمىستارىن جۇرگىزۋ قيىنعا سوعىپ وتىر. ءتىپتى عالىمدار ەجەلگى جادىگەرلەردى تاپقانىمەن، ونى مۇراجايدا ۇزاق ۋاقىت ساقتاۋ مۇمكىن بولماي تۇر ەكەن.
سەبەبى ەكسپوناتقا ءتيىستى كۇتىم جاساي الاتىن مامان جوقتىڭ قاسى. بۇكىل قىرعىزستاندا نە- بارى ون ارحەولوگ جۇمىس ىستەپ ءجۇر. ارينە ەجەلگى تاريحى بار مەملەكەت ءۇشىن بۇل جەتكىلىكسىز. عالىمداردىڭ ايتۋىنشا، ىزدەستىرۋ جانە قازبا جۇمىستارىنا قاجەتتى قاراجات بولىنسە، ەلدىڭ ءاربىر ايماعىندا كوپتەگەن جادىگەر تابۋعا بولار ەدى. الايدا قازىر وسى ىسپەن كوبىنە عىلىم اكادەمياسىنىڭ ماماندارى ەمەس، «قارا قازۋشىلار» دەگەن اتپەن بەلگىلى ادامدار اينالىسىپ ءجۇر. ال ولاردىڭ نەگىزگى ماقساتى - ەلدىڭ تاريحي مۇراسىن ساقتاۋ ەمەس، پايدا تابۋ.
كۋنبولوت اكماتوۆ، ارحەولوگ:
- جەكەمەنشىك كوللەكسيالاردىڭ بىرىندە تالاس القابىندا تابىلعان وتە ءبىر قىزىق، تەڭدەسى جوق زات بار. بۇل اسىل مەتالدان جاسالعان اشەكەيلى بەلدىك. ونى جەرگىلىكتى ءبىر تۇرعىن تاۋىپ، وزگە بىرەۋگە ساتقان، ول ءوز كەزەگىندە تاعى دا بىرەۋگە ساتىپ، اقىرى جەكەمەنشىك جيىنتىققا تۇسەدى.
تاعى ءبىر تۇيىتكىل - ەكسپوناتتاردىڭ دۇرىس ساقتاۋ ماسەلەسى. ۋاقىت وتىسىمەن كونە زاتتار توزادى، سول سەبەپتەن جادىگەرلەرگە مۇقيات كۇتىم قاجەت. الايدا ەلدە ەكسپوناتتاردىڭ دۇرىس ساقتالۋىن قامتاماسىز ەتەتىن ءتيىستى ماماندار جوق بولعاندىقتان، رەسەيلىك مۇراجايلاردىڭ كومەگىنە جۇگىنۋگە تۋرا كەلەدى. وكىنىشكە وراي، قىزمەتتىڭ بۇل ءتۇرى ارزان ەمەس، سول سەبەپتەن قىرعىز عالىمدارى وسى سالادا ءوز ماماندارىمىزدى دايىنداۋ قاجەت دەگەندى العا تارتىپ وتىر.
كۋباتبەك تابالديەۆ، تاريح عىلىمدارىنىڭ دوكتورى:
- عىلىمي قىزمەتكەرلەردىڭ جالاقىسى 3 مىڭنان 6 مىڭ سومعا دەيىن. سوندىقتان بۇل سالاعا جاس مامانداردى تارتۋ قيىن. ال بۇكىل الەمدە ارحەولوگيا مەن ەتنوگرافيا ماڭىزدى عىلىم سانالادى. سايكەسىنشە، مۇراجاي قىزمەتكەرى بولۋ ۇلكەن ابىروي. پارلامەنت دەپۋتاتتارى الدىندا وسى ماسەلەنى كوتەرگەن مادەنيەت، اقپارات جانە تۋريزم ءمينيسترى سۋلتان دجۋماگۋلوۆ قىرعىز ۇلتتىق ۋنيۆەرسيتەتىندە مۇراجاي ماماندارىن دايىندايتىن كافەدرا اشۋدى ۇسىندى. ازىرشە ءبىلىم مينيسترلىگىنەن وسى ۇسىنىسقا جاۋاپ تۇسكەن جوق. ءبىراق ەل تاريحىن ساقتاپ قالۋ ءۇشىن مۇنى كەشىكتەرمەۋ قاجەت. «قارا قازۋشىلاردىڭ» جۇمىسىنا زاڭمەن تىيىم سالۋ قاراستىرىلعانمەن، بۇل ارحەولوگتار مەن مۇراجاي ماماندارىنىڭ جەتىسپەۋشىلىگىن شەشپەيتىنى انىق.
www.24.kz
