سىرداريا وزەنىندەگى كوشكەن سەڭ ارال تەڭىزىنە جاقىندادى

بۇل تۋرالى وبلىستىق جۇمىلدىرۋ دايىندىعى باسقارماسى باسشىسى سەرىك سەرماعامبەتوۆ ءمالىم ەتتى.

باسقارما باسشىسىنىڭ ايتۋىنشا، بۇگىندە داريا جاعالاۋى مەن ەلدى مەكەندەردى سۋ الۋ جونىندە ەشقانداي قاۋىپ تۋىنداپ وتىرعان جوق. داريانىڭ تومەنگى بولىگىندەگى بارلىق قورعانىس بوگەتتەرى نىعايتىلعان. ماماندار تاراپىنان تاۋلىك بويىنا وزەن ارناسى تۇراقتى باقىلانىپ وتىر.

«ءبىزدىڭ بولجام بويىنشا بۇگىن، 31- ناۋرىزدا كەشكە قاراي مۇز ارال تەڭىزىنە جەتەدى. سەڭ كەپتەلىسى جوق. وتكەن جىلدارى قاۋىپتى جەرلەردىڭ بوگەتتەرى بەكىتىلگەن بولاتىن. ال، مۇز قالىڭدىعى 30-40 سانتيمەتر بولعان جەرلەردە ونى جارۋ شارالارى جۇرگىزىلدى»، - دەدى س. سەرماعامبەتوۆ.

ەستەرىڭىزگە سالا كەتسەك، 28- ناۋرىزدا قازالى اۋدانىنداعى ءا. تىنىبايەۆ اتىنداعى قازالى سۋ تورابىنىڭ دەڭگەيى كوتەرىلىپ، داريا بويىنداعى قورعانىس بوگەتتەرىنە قاۋىپ ءتوندىردى. ال 29- ناۋرىز كۇنى قازالى اۋدانىندا مۇز سالدارىنان بوگەتتى سۋ شايدى. سالدارىنان «شاعالا» تىنىعۋ لاگەرى ماڭىن سۋ الدى.

باسقارما باسشىسىنىڭ ايتۋىنشا، لاگەر جانىندا سۋ تارتۋ جۇمىستارى جۇرگىزىلۋدە. «ونىڭ 2,9 گەكتار اۋماعىن سۋ باستى. قازىرگى كەزدە سۋ تارتۋ جۇمىستارى جۇرۋدە. جالپى، لاگەردىڭ جوندەۋ جۇمىستارىنا قارجى بولىنگەن، الداعى ۋاقىتتا وندا كۇردەلى جوندەۋ وتكىزىلەدى»، - دەدى س. سەرماعامبەتوۆ.