قازاقستاننىڭ ۇزدىك گەولوگتارى ماراپاتتالدى - فوتو

استانا. قازاقپارات - بۇگىن استانادا گەولوگ كۇنىنە وراي سالتاناتتى جينالىس ءوتىپ، شارا بارىسىندا سالانىڭ ۇزدىك ماماندارى ماراپاتتالدى، دەپ حابارلايدى قازاقپارات.

ق ر ينۆەستيتسيالار جانە دامۋ ۆيتسە-ءمينيسترى قايىربەك وسكەنبايەۆ ەل ەكونوميكاسىنىڭ وسۋىنە اسەر ەتىپ وتىرعان سالالاردىڭ ءبىرى گەولوگيالىق بارلاۋدى قولداۋعا مينيسترلىك ەرەكشە نازار اۋداراتىنىن اتاپ ءوتتى.

اتاپ ايتقاندا، مەملەكەت باسشىسى بۇل سالانى دامىتىپ، گەولوگيانى الەمدىك دەڭگەيگە شىعارۋ جونىندە مىندەت قويدى. وسى ماقساتتى ورىنداۋ تۇرعىسىندا وزىق الەمدىك تاجىريبەگە نەگىزدەلگەن «جەر قويناۋى جانە جەر قويناۋىن پايدالانۋ تۋرالى» كودەكس قابىلداندى.

سونىمەن، «قازاقستان رەسپۋبليكاسىنىڭ كەن ورنىن العاش اشۋشى» توسبەلگىسىمەن «KAZENERGY» قاۋىمداستىعى ءتوراعاسىنىڭ ورىنباسارى ۇزاقباي قارابالين، «مەريديان پەتروليۋم» ج ش س پرەزيدەنتى بالتابەك قۋاندىقوۆ، «سمارت ينجينيرينگ» ج ش س باس گەوفيزيگى ولەگ تۋركوۆ، «مەريديان پەتروليۋم» ج ش س باس گەوفيزيگى ماريس نازاروۆ ماراپاتتالدى.

«جەر قويناۋىنىڭ قۇرمەتتى بارلاۋشىسى» بەلگىسى «سەنتر گەولسەمكا» ج ش س ۆيتسە-پرەزيدەنتى ۆالەري تاپايەۆقا تاپسىرىلدى.

سونىمەن قاتار «جەر قويناۋىن بارلاۋدىڭ ۇزدىگى» توسبەلگىسىمەن «قازگەولوگيا» ۇلتتىق گەولوگيالىق بارلاۋ كومپانياسى» ا ق گەولوگيا دەپارتامەنتىنىڭ 1- دارەجەلى گەولوگى اسەت بەكەتوۆ ماراپاتتالدى.

بۇدان بولەك، «ەڭبەك ارداگەرى» مەدالى «قازگەولوگيا» ۇلتتىق گەولوگيالىق بارلاۋ كومپانياسى» ا ق گەوفيزيكالىق زەرتتەۋلەر دەپارتامەنتىنىڭ ءى دارەجەلى گەوفيزيگى بارلىباي سماعۇلوۆقا، «قازگەواقپارات» رگاو اعا ينجەنەرى ءبيبىسارا بەگلەنوۆاعا تابىستالدى.

مۇنىمەن قوسا تاعى 13 ادام قۇرمەت گراموتالارى مەن العىس حاتتار الدى.

وسىعان دەيىن حابارلانعانداي، گەولوگيالىق زەرتتەۋ جۇمىسىن جۇرگىزۋدىڭ ناتيجەسىندە بولجامدى رەسۋرستاردى انىقتاۋ جوسپارى ورىندالدى.