زاعيپ جاندارعا ارنالعان ۇيالى تەلەفوندار كەيىن قايتارىلادى

بۇل دەرەكتى وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باستىعى تالعات دۇيسەبايەۆ راستادى.

مامانداردىڭ ايتۋىنشا، تەحنيكالىق ەرەكشەلىكتەرگە سايكەس كورۋ قابىلەتى تومەن ازاماتتارعا ارنالعان تەلەفونداردا مىندەتتى تۇردە سويلەۋ سينتەزى ورناتىلۋى ءتيىس. وكىنىشكە وراي، سىر وڭىرىندەگى زاعيپتارعا بەرىلگەن بايلانىس قۇرالدارىندا مۇنداي جۇيە بولماعان. جالپى، ءونىم بەرۋشىمەن 2 تاۋلىك ىشىندە ءاربىر تەلەفون اشىلىپ، عالامتورعا قوسىلعان SIM- كارتا سالىنىپ، سويلەۋ سينتەزى ورناتىلىپ، جەتكىزىلگەن ەدى.

دەگەنمەن، تەلەفوندى پايدالانۋ بارىسىندا اقاۋلىق بايقالعان. سونىڭ سالدارىنان ول جارامسىز دەپ ەسەپتەلگەن. بۇل جايىندا ءبىرىنشى توپ مۇگەدەگى التىنگۇل سىدىقوۆا «ۇيالى تەلەفون وتكەن جىلدىڭ جەلتوقسان ايىندا بىزدەرگە تاراتىلىپ بەرىلگەن ەدى. الايدا، ونى پايدالانا العان جوقپىز. اۋكسيوندا جەڭىمپاز بولعان ءونىم بەرۋشى تاراپىنان وسىنداي ولقىلىقتىڭ ورىن العانى وكىنىشتى» دەيدى.

وسىلايشا كەرى قايتارىلعان 135 تەلەفوننىڭ 103 ى جارامسىز دەپ تانىلعان. ۇستىمىزدەگى جىلدىڭ 12 -ناۋرىزىندا «گراند» جەكە كاسىپكەرىنىڭ «5 ەلەمەنت» سەرۆيس ورتالىعىمەن تەلەفونداردىڭ ساپاسى مەن جارامدىلىعىنا ساراپتامالىق قورىتىندى بەرۋ ماقساتىندا كەلىسىم- شارت جاسالدى.

«اتالمىش سەرۆيس ورتالىعىنان ءاربىر تەلەفوننىڭ ساپاسى مەن جارامدىلىعىنا قورىتىندى الىنادى. سودان كەيىن سوت ورگاندارىنا تالاپ ارىز جولدانادى.

ايتا كەتەلىك، بۇل دۇنيەلەر - ءبىزدىڭ باسقارما تاراپىنان زاعيپ جاندارعا بەرىلىپ وتىرعان العاشقى تەلەفوندار. كەلەشەكتە مۇنداي ولقىلىققا جول بەرمەۋگە نازار اۋدارىپ وتىرمىز. سول ماقساتتا قۇرىلاتىن كوميسسيا قۇرامىنا مۇگەدەكتەر، زاعيپ جانداردان وكىلدەر ەنگىزۋدى كوزدەپ وتىرمىز» دەدى باسقارما باسشىسى ت. دۇيسەبايەۆ.

باسقارما باسشىسىنىڭ ايتۋىنشا، 2017 -جىلدىڭ شىلدە ايىندا ءاربىر داناسى 125 مىڭ تەڭگە تۇراتىن 160 تيفلوتەحنيكالىق قۇرال- دىبىسپەن حابار بەرەتىن جانە ديكتوفونى بار ۇتقىر تەلەفوندى ساتىپ الۋعا وبلىستىق بيۋدجەتتەن 20 ميلليون تەڭگە قارالعان.

«بۇل ماقساتتا وتكەن اۋكسيونعا بارلىعى 8 ءونىم بەرۋشى قاتىستى. 2017 -جىلعى حاتتاماعا سايكەس ءار تەلەفوننىڭ باعاسى 33,5 مىڭ تەڭگەدەن بەلگىلەندى. سونىڭ ناتيجەسىندە 160 دانا تەلەفون 5,3 ميلليون تەڭگەنى قۇرادى. جەڭىمپاز رەتىندە «ساڭىراۋلاردىڭ قازاق قوعامى» قوعامدىق بىرلەستىگىنىڭ « قىزىلوردا وقۋ- وندىرىستىك كاسىپورنى مەكەمەسى جەڭىمپاز دەپ تانىلعان ەدى. ۇنەمدەلگەن 14 ميلليون تەڭگەدەن استام قارجى بيۋدجەتكە قايتارىلعان» دەدى ت. دۇيسەبايەۆ.

ادىلەت قاڭتاربايەۆ