سەنات دەپۋتاتتارى ءبىر كۇندىك جالاقىلارىن شىعىس قازاقستانعا اۋدارادى

استانا. قازاقپارات - پارلامەنت سەناتىنىڭ دەپۋتاتتارى ءبىر كۇندىك جالاقىسىن شىعىس قازاقستان وبلىسى اۋماعىندا سۋ تاسقىنىنان زارداپ شەككەندەرگە اۋدارادى، دەپ حابارلايدى قازاقپارات.

«شىعىس قازاقستان وبلىسىندا تۇرعىندار سۋ تاسقىنىنان زارداپ شەگۋدە. وڭىردە قاردىڭ از تۇسۋىنەن توپىراق قاباتى 1,5-2 مەتر تەرەڭدىككە دەيىن توڭ بولىپ قاتقان. سونىمەن قاتار ونىڭ كۇرت ەرۋى ءارى تولاسسىز جاۋىن-شاشىن سالدارىنان وزەندەردە سۋ دەڭگەيى شامادان تىس كوتەرىلۋىنە بايلانىستى بەس قالا ( اياگوز، وسكەمەن، ريددەر، شەمونايحا، سەمەي) جانە 12 اۋدان سۋ تاسقىنىنا ۇشىرادى. وسىعان بايلانىستى ءبىرقاتار اۋدانداردا توتەنشە جاعداي جاريالاندى. جەرگىلىكتى اتقارۋشى ورگان تابيعي اپاتقا بايلانىستى ءتيىستى شارالار قابىلداۋدا. بارلىق شىعىس قازاقستاندىقتار جۇمىلىپ، ءتىلسىز جاۋعا قارسى بەلسەنە كۇرەسىپ جاتىر. الايدا تەحنيكا مەن ادام كۇشى بارىنشا جۇمىلدىرىلۋىنا قاراماستان، ورىن الىپ وتىرعان جاعداي قوسىمشا قارجىلاي قولداۋدى قاجەت ەتەدى»، - دەپ توقتالدى سەناتور دۇيسەنعازى مۋسين سەناتتىڭ جالپى وتىرىسىندا.

وسى ورايدا د. مۋسين بۇل ماسەلەدە اۋىزبىرشىلىك پەن اعايىنشىلىقتى، قامقورلىق پەن كومەك كورسەتۋ قاجەتتىگىن اتاپ ءوتتى.

«ارىپتەستەر، سۋ تۇتقىنىندا قالعان جانە تابيعي اپات سالدارىنان ۇلكەن قيىندىقتارعا كەز بولعان شىعىس قازاقستان وبلىسىنداعى وتانداستارىمىزعا كومەك قولىن سوزىپ، 1 كۇندىك جالاقىمىزدى اۋدارۋدى ۇسىنامىن. وسىلايشا، ءبىز قيىن ۋاقىتتا قولىمىز جەتپەسە دە، كوڭىلىمىز بەن جۇرەگىمىز وسى ءوڭىر حالقىمەن بىرگە ەكەنىن كورسەتىپ، ۇسىنىسىمدى قولداۋلارىڭىزدى سۇرايمىن»، - دەدى دەپۋتات.

ءوز كەزەگىندە سەنات ءتوراعاسى قاسىم-جومارت توقايەۆ سەناتوردىڭ بۇل ۇسىنىسىنا قولداۋ ءبىلدىردى.

«قارسىلىق بولمايدى عوي. جاقسى ۇسىنىس. شەشىم قابىلداندى دەپ ەسەپتەيمىز. بۇل ءبىزدىڭ شىعىس قازاقستان وبلىسىنداعى سۋ تاسقىنىنان زارداپ شەككەن ازاماتتارعا كورسەتكەن كومەگىمىز بولسىن»، - دەدى توقايەۆ.