قازاقستاندا جاستارعا ارنالعان تەلەارنا اشىلدى

«J1-Jastar1»  تەلەارناسى - جاستاردىڭ تالاپتارىنا ساي زاماناۋي تەليەۆيزيالىق ترەندتەردى تاراتاتىن، جاستاردىڭ جوبالارىن، وي- پىكىرلەرىن قولداۋعا، سونىمەن قاتار ولاردىڭ اراسىنداعى وزەكتى ماسەلەلەردى شەشۋگە باعىتتالعان جاڭا فورماتتاعى ارنا. تەلەارنا 2018 -جىلدىڭ 28 - ناۋرىزىندا ID TV پلاتفورماسىندا، You tube پەن Instagram الەۋمەتتىك جەلىلەرىندە ىسكە قوسىلدى. بولاشاقتا «وتاۋ ت ۆ» كابەل جۇيەسى ارقىلى تاراتۋ جوسپارلانىپ وتىر.

«وسىنداي تەلەارنا اشۋعا ءبىر كۇن ەمەس، ءبىرشاما ۋاقىت دايىندالدىق. جاستار ارناسىن اشۋعا نە سەبەپ بولدى؟ ەلىمىزدە جاستارمەن بىرگە جۇمىس ىستەيتىن ارنايى تەلەارنانىڭ جوقتىعىن بايقادىق. وزگە باعىتتا دا ارنا اشۋ جونىندە ويلار بولعانىمەن، جاستاردىڭ باعىتىمەن بىرگە بولۋدى شەشىپ، اقىرى جاستار ارناسىن اشۋعا بەل بايلادىق. وزدەرىڭىزگە بەلگىلى، قازاقستان نارىعىندا كوپتەگەن تەلەارنالار بار. ال شىن مانىندە، جاستار ءوزىنىڭ ويىن جەتكىزىپ، ءبىر- بىرىمەن ءتىل تابىسا الاتىن، كوكەيىندەگى سۇراقتارعا جاۋاپ تابا الاتىن تەلەارنانىڭ جوقتىعى وسى ارنانى اشۋعا مۇرىندىق بولدى. تەلەارنانىڭ ەڭ نەگىزگى باعىتى - ءبىلىم، ساياسات جانە جاستاردىڭ تۇرمىس- تىرشىلىگى، جاستاردى ويلاندىرىپ جۇرگەن ماسەلەلەردى قاۋزاۋ. بۇل جەردە جاستارعا ارنالعان باعدارلامامەن بىرگە، فيلمدەر دە بولادى» ، - دەدى ورتالىق كوممۋنيكاتسيالار قىزمەتىندە تەلەارنانىڭ باس ديرەكتورى ءىلياس ىسقاقوۆ.

«J1-Jastar1»  تەلەارناسى، ەڭ الدىمەن، 14-29 جاس ارالىعىنداعى جاستارعا باعىتتالعانىمەن، وقۋشىلار، ستۋدەنتتەر، جاس ماماندار مەن ءارتۇرلى قىزمەت اتقاراتىن جاس ۇرپاقتىڭ ويىنا نەمقۇرايلى قارامايتىن بارلىق جاندار ءۇشىن قىزىقتى بولماق.

ارنانىڭ فورماتى - جاستار ومىرىندەگى ماڭىزدى ءارى قىزىقتى وقيعالار. تەلەارنانىڭ كونتەنتى وزىندىك وندىرىستەرى اس ءۇيى، ءسان مەن سۇلۋلىقتان باستاپ شىتىرمان، تىلسىم وقيعالارعا، سپورتقا، تەلەحيكايالار مەن الەمدىك كينوماتوگرافيانىڭ حيتتەرىنە، الەۋمەتتىك رەاليتي مەن وتباسىلىق قارىم- قاتىناس، باقىت، بالا تاربيەلەۋ مەن دەنساۋلىق تۋرالى باعدارلامالاردان تۇرادى.

«تەلەارناعا جەكە ينۆەستورلار اقشا سالادى. ارنا رەيتينگى جوعارى ءارى قىزىقتى بولۋى كەرەك دەپ ەسەپتەيمىز. سوندىقتان، وسىلايشا، دەمەۋشىلەر مەن جارنامالار بەرۋشىلەردى تارتقىمىز كەلەدى» ، - دەدى ءىلياس ىسقاقوۆ.