بيلىك شەتەلدە جۇمىس ىستەيتىن قىزداردى ەلگە قايتارماق
استانا. قازاقپارات - تۇرىكمەنستاننىڭ لەباپ وبلىسىنداعى ءبىرقاتار اۋداندا 6 -ناۋرىزدا جەرگىلىكتى بيلىك ارنايى جينالىس ۇيىمداستىرىپ، تۇرىكمەن ميگرانت قىزدارىن ەلگە قايتارۋ ماسەلەسىن كوتەرگەن، دەپ حابارلايدى Baq.kz اقپارات اگەنتتىگى ازاتتىق باسىلىمىنا سىلتەمە جاساپ.
حابارلارعا قاراعاندا، تۇركياعا كەتىپ، ءۇش جىلدان استام ۋاقىت ەلگە ورالماعان قىزداردىڭ تۋىسقاندارىنا قاۋىپسىزدىك ورگاندارى ارقىلى قىسىم كورسەتىلۋى مۇمكىن.
لەباپ ۋالاياتىنا قاراستى چاردجوۋ ەترابىنىڭ تۇرعىنى ازاتتىق راديوسىنا بولعان جايدى بايانداپ بەردى.
«جەرگىلىكتى بيلىك تۇركيادا جۇمىس ىستەيتىن قىزدارىمىزدىڭ ەلگە قايتقانىن تالاپ ەتتى. ولار ەلگە ورالماسا، اكىمشىلىك جاۋاپقا تارتىلادى دەپ قورقىتتى. ءبىز عانا ەمەس، تانىستارىمىزعا دا وسىلاي دەگەن»، - دەدى جەرگىلىكتى تۇرعىن.
